Doktor kasapi i PD Sali Berisha duket se është lënë në mëshirë të fatit, ndërsa ka marrë një goditje të fortë nga aleati i tij, Ilir Meta.
Kjo pasi kreu i Partisë së Lirisë, Ilir Meta, i ka marrë Berishës dy komisionerët në zgjedhjet e pjesshme për Bashkinë Kukës, si dhe 20 milionë lekë për zgjedhjet vendore të ardhshme, ndërkohë që gati 250 mijë vota të demokratëve referuar zgjedhjeve të 14 majit, kanë shkuar për partinë e spiunit “Like”, për shkak se kreu i PL akuzohet se ka qenë bashkëpunëtorë i ish-Sigurimit të Shtetit në fund të viteve ’80.
Pra duket qartë se Sali Berisha jovetëm që ka mbetur pa parti, por ai është shndërruar në zar i Ilir Metës. Thënë troç po faktohet ajo që gazeta “SOT” ka paralajmëruar se puçi që kreu i Partisë së Lirisë i bëri “non-gratës” në kurriz të demokratëve më 14 maj ishte asgjësimi i “Foltores” dhe rritja e partiçkës së tij në kurriz të demokratëve.
Reagon KQZ
Megjithatë përvetësimin e fondeve që u takojnë demokratëve e ka zbuluar dje Komisioni Qendror i Zgjedhjeve. Ky i fundit miratoi dje vlerën e një flete votimi, duke mundësuar përllogaritjet e mbështetjes financiare që do të marrin partitë politike në zgjedhjet e ardhshme vendore.
Formula merr në konsideratë numrin e votave të mbledhura nga subjekti në garën e 14 majit, ku performanca e mirë e socialistëve do t’u mundësojë akoma më shumë fonde garën e ardhshme për bashkitë.“Nga partitë politike nuk kemi patur komente?! Ok e miratojmë projekt-aktin nga e cila përcaktojnë vlerën e votës në shumën e 81 lekëve”, tha kreu i KQZ-së, Ilirjan Celibashi.
Ndërkohë, Partia Socialiste do të jetë ajo që të marrë pjesën e luanit si fituese e zgjedhjeve vendore, pasi arriti të marrë mbi 579 mijë vota. Ndërsa, Ilir Meta si drejtues i koalicionit “Bashkë Fitojmë” ka rreth 247 mijë vota, që do të thotë se fluksi i demokratëve do të përkthehet në më shumë fonde për Partinë e Lirisë.
Përkthyer në para, socialistët do të marrin 46.9 milionë lekë, ndërsa Ilir Meta 20 milionë. PD zyrtare mori 103 mijë vota, që do t’i japin Lulzim Bashës 8.4 milionë lekë. Me përfitim del edhe PSD-ja e Tom Doshit, që mbi 86 mijë votat e saj, do t’i përkthejë në rreth 6.9 milionë lekë.
KAS rrëzon Bashën, Ilir Meta merr komisionerët e Partisë Demokratike
Nga ana tjetër, Ilir Meta do të vijojë të ketë më shumë komisionerë se Partia Demokratike zyrtare në zgjedhjet e parakohshme të Kukësit. Edhe Komisioni i Sanksioneve dhe Ankesave, një lloj si Ilirjan Celibashi, vendosi pak ditë më parë se Partia e Lirisë është forcë e parë e opozitës. Një favor ky që i vlen si drejtues i koalicionit me Berishën. Pak ditë më parë, KAS rrëzoi ankesën e PD-së që donte të rifitonte komisionerët, duke lënë në fuqi formulën se Meta ka 2 komisionerë dhe Basha vetëm 1.
Ngelet për tu parë nëse Basha do ta përdorë këtë element të procedurës, si një pretekst për të mos marrë pjesë në zgjedhjet e 24 shtatorit. Pjesëmarrja e tij në garë, kur baza demokrate në Kukës refuzon përçarjen e Tiranës, do të ishte një rrugëtim thuajse i sigurt drejt humbjes së radhës së kryetarit Basha.
1 shtatori është data e fundit që partitë që duan të marrin pjesë në zgjedhjet e pjesshme, të regjistrohen në KQZ. Të dielën e fundit të shtatorit, Kukësi do të zgjedhë kryetarin e ri të Bashkisë, pasi Safet Gjici, socialisti fitues i 14 majit, u përfshi në një skandal seksual, u shkarkua dhe u arrestua./Nga Sidorela Braçja