Kunati i kryeministres italiane, Giorgia Meloni, Francesco Lollobrigida i cili mban postin e ministrit të Bujqësisë në një tentativë për të justifikuar ikjen masive të italianëve për pushime drejt rivierës shqiptare, nxori me padashje problematikat e plazheve italiane.
Kunati i Melonit i cili paralajmëroi një udhëtim të mundshëm rrufe në tokën e shqiponjave këto ditë për të parë se përse ikin italianët në Shqipëri, deklaroi se ata persona të cilët kanë para mund të bëjnë pushime në Itali, ndërsa të tjerët të cilët nuk kanë mundësi mund t’i bëjnë pushimet në Shqipëri.
Ai shtoi se edhe pse me çmime shumë herë më të shtrenjta, plazhet italiane ofrojnë shumë më shumë se ato shqiptare. Sipas tij Shqipëria ka një rrugë të gjatë për t’u krahasuar me Italinë.
“Jam kurioz të shoh me sytë e mi hendekun mes oferta puliane cilësore dhe asaj shqiptare, e cila po përpiqet të rikuperojë terren duke parë ekselencën tonë. Jemi të sigurt se ajo që gjejmë këtu nuk mund të gjendet atje. Kryeministri shqiptar Edi Rama, i cili gëzohet me një meme për kundëreksodin historik që sheh italianët të grumbullohen në plazhet e Vlorës dhe Sarandës njëzet vjet pas zbarkimit të Vlorës në Bari, “është shumë i këndshëm. Por të gjithë në vendin e tij edhe Rama e di që ka shumë për të mësuar nga Italia dhe ne kemi shumë për t’iu mësuar. Italia dhe Pulia janë shumë përpara. Pra, ju lutem, me gjithë respektin për miqtë e shumtë në Mesdhe, ata aspirojnë të bëhen si ne, por sot nuk janë. Ndoshta pas pesëmbëdhjetë apo njëzet vjetësh. Tani për tani ata që duan të paguajnë më pak dhe kanë më pak shkojnë atje. Kushdo që dëshiron të paguajë pak më shumë dhe të marrë pak më shumë vjen këtu”, tha ai.
Kaq ka mjaftuar më pas që mediat italiane ta kryqëzojnë ministrin e Bujqësisë për deklarata e tij. “la Stampa” i ka kushtuar një artikull ku krahashon çmimet e pushimeve në Shqipëri dhe Itali duke ja plasur në fytyrë faktet dhe shifrat startosferike, ministrit italian.
Artikulli i “la Stampa”
Vera e rritjes së çmimeve bën që shumë familje të kërkojnë destinacione më pak të shtrenjta për pushime. Në plan të parë këto ditë është Shqipëria. Krahasimi mes tarifave italiane dhe asaj shqiptare nxjerr në pah një distancë të madhe mes çmimeve. Ndërkohë, në resortet turistike të vendit tonë, frekuentimi shënon një rënie prej 30%.
Në Itali, shërbimet turistike kushtojnë deri në 248% më shumë se në vendpushimet bregdetare të Shqipërisë dhe rritjet shumë të forta të regjistruara në vendin tonë përsa i përket ambienteve akomoduese, ambienteve të plazhit dhe restoranteve shtyjnë një pjesë të konsiderueshme të qytetarëve të zgjedhin destinacionet e huaja për pushimet verore. Kështu deklaroi Consumerismo No Profit, i cili sot krahasoi çmimet dhe tarifat e destinacioneve kryesore bregdetare shqiptare me ato të vendit tonë.
“Për të fjetur 7 net në një nga resortet bregdetare më të njohura të Shqipërisë, nga data 21 deri më 28 gusht në dhomë dyshe, kostoja minimale fillon nga 175 euro në Vlorë deri në 420 euro në Qeparo – analizon Consumerismo. Nëse zgjidhni struktura ekskluzive apo luksoze, kostoja maksimale arrin në 5.653 euro në Vlorë dhe 2.300 euro në destinacionet e tjera shqiptare.
Në Itali: në të njëjtën javë një qëndrim fillon nga një minimum prej 564 euro në Milano Marittima, 735 euro në San Vito Lo Capo dhe 889 euro në Villasimius, por mund të arrijë, përsëri nëse zgjidhni struktura ekskluzive, 17,378 euro në Viareggio dhe më gjerë në 15 mijë euro në Milano Marittima.
Sipas përllogaritjeve të shoqatës së konsumatorëve, duke krahasuar 6 resorte të njohura bregdetare shqiptare me po aq destinacione bregdetare italiane, rezulton se në vendin tonë tarifat minimale të objekteve akomoduese janë mesatarisht më të shtrenjta me +130% krahasuar me Shqipëria, dhe +248% për hotelet e kategorisë së lartë.
Më pas kalojmë në ambientet e banjës, të cilat në Itali kushtojnë mesatarisht 162% më shumë se brigjet shqiptare: për marrjen me qira ditore të një ombrellë dhe dy shezlongësh, në fakt, kostoja varion nga një kosto mesatare prej 20/30 euro në Milano Marittima në 30/50 euro në Gallipoli, kundrejt 10/15 euro në brigjet shqiptare.
Shqipëria është gjithashtu më e lirë në frontin e kateringut: në fakt, një vakt i plotë me bazë peshku kushton mesatarisht në restorantet shqiptare nga 20 deri në 25 euro për person, kundrejt 45/65 euro në Itali.