Aktivistja shqiptaro-amerikane, Evi Kokalari u është rikthyer akuzave të saj ndaj ish-kryeministrit Sali Berisha dhe bashkëpunëtorëve të këtij të fundit brenda “Foltores”.
Edhe pse në fillim kanë qenë miq për kokë, raportet mes Berishës dhe Kokalarit u prishën, teksa aktivistja nxori “shpatën nga kllëfi”, ku përveçse nisi ofensivën ndaj kreut të “Foltores” dhe zbuloi se është kërcënuar nga njerëzit e tij, hodhi akuza të forta ndaj lidershipit të “Rithemelimit”.
Thuajse çdo ditë zonja Kokalari lëshonte siluara e arsenal akuzash ndaj Berishës, ndërkohë që së fundmi ajo ka riaktivizuar sulmet. Përmes një statusi në rrjetet sociale, aktivistja Kokalari zbulon se ndërtimi i pallatit në mes të Tiranës nëpërmjet firmës së qeverisë dhe pronarëve që janë miq të familjes Berisha, janë prova që DASH mund t’i përdorë për të plotësuar dosjen për korrupsionin e tij.
Kokalari tha se ish-kryeministri duhet të vërtetojë këto akuza “bombë” pasi ai pritet të përjetojë ferrin. Ajo zbuloi se Berisha i premtoi besnikut të tij Belind Këlliçi disa apartamente në këtë kullë.
“Gjatë zgjedhjeve të 14 Majit, dikush më tha për ndërtimet tek pallati i kulturës, madje më thanë se Këlliçit i ishte premtuar një kat, ose disa apartamente në të njëjtin kat. E injorova sepse nuk kisha fakte që ta adresoja publikisht.
Në bazë të lajmeve sot, di t’ju them seriozisht uroj mos jenë të vërteta, sepse nëse verifikohet se kush është mbas këtyre ndërtimeve dhe nëse kjo është arsyeja pse zgjedhjet j’u falën Velias, siç i themi këtu në Amerikë:
“All hell Willbreak lose’. (Ferri do të humbasë) Për të mos thënë që nëse këto janë të vërteta, Berisha sapo i dha provat e korrupsionit DASH-it për të justifikuar sanksionet dhe desinjimin ‘non-grata’ ndaj tij dhe familjes.Besoj se e vetmja mënyrë për ta adresuar këtë lajm, është përgënjeshtrimi nga Berisha vetë, dhe sa më shpejtë që të jetë e mundur”, u shpreh Kokalari.
Alibia e dobët e Berishës për të justifikuar akuzat
Edhe pse Kokalari i kërkon Berishës të sqarojë të vërtetën, Berisha deri më tani ka përdorur justifikime të dobëta. Sali Berisha krijoi një alibi të dobët në lidhje me akuzat publike që janë bërë fillimisht prej Lulzim Bashës dhe PD-së zyrtare dhe më pas nga mediat, e gazetarët se ai dhe familjarë të tij qëndrojnë pas ndërtimit të kullës në lulishten pas Teatrit të Operas dhe Baletit në Tiranë. Berisha, ashtu siç më herët edhe djali i tij Shkëlzeni, sfidoi Kryeministrin Edi Rama që të anulojë lejen e dhënë.
Thirrjet për të anuluar lejen si refren për të rrëzuar këto akuza nuk bëhet më kot.Berisha e di shumë mirë që në këtë fazë të projektit, kur kompania ndërtuese pas të cilës akuzohet se qëndron djali i tij, ka paguar për hartimin e projektit, ka lidhur kontratat për furnitorët, apo kompanitë e tjera nënkontraktore që mund të kryejnë punime në kantier, anulimi i lejes është e pamundur.
Është i pamundur sepse kompania ndërtuese mund t’i drejtohet Arbitrazhit, jo vetëm për të përmbushur marrëveshjet e mundshme të nënshkruara me kompanitë nënkontraktore të saj, por edhe si dëmshpërblim shumëfish për investimet e deritanishme në këtë projekt.Por jo vetëm kaq. Në deklaratën publike, Sali Berisha ngatërroi me, apo pa dashje thelbin e akuzave. Ai tha se si Kryeministër i vendit nuk ka firmosur asnjëherë për kulla në Tiranë. Por, në rastin e kullës pas Teatrit të Operas dhe Baletit askush nuk e ka akuzuar se ka firmosur ndërtimin e kullës. Firma për ndërtimin e saj është e Edi Ramës.
Ajo që akuzohet Berisha, që ish-kryeministri nuk e kupton, ose bën sikur s’e kupton është lidhja e djalit të tij, Shkëlzen Berisha me ndërtuesin e kullës, jo firma për ndërtimin e kullës. E thënë më thjesht, Berisha akuzohet se është ndërtuesi faktik i kullës, një term që së fundmi e kemi parë shpesh të përdoret nga SPAK në hetimin e çështjes së inceneratorëve.
Pikërisht me inceneratorët u mor Berisha edhe këtë të hënë në daljen për mediat, ku përsëriti deklaratat e mëhershme dhe u përpoq të minimizojë lidhjet e veta me kullën pas Teatrit të Operas dhe Baletit si gjoja zhurmë.