Punonjësit e Shërbimit diplomatik shqiptar nuk kanë marrë ende pagat e muajit të shkuar. Denoncimi është bërë dje për portalin “TPZ.al” e Ylli Rakipit sipas tij nga një punonjës në selinë diplomatike të Shqipërisë në Itali.
Sipas gjoja karrocierit diplomat shqiptar, që i’a ka qarë hallin Yllit arsyeja e vonesës së marrjes së pagave është bllokimi i llogarive bankare të ambasadës në një bankë italiane ku kalohet fondi për selinë diplomatike të Shqipërisë.
Kjo sipas tij është bërë pak ditë më parë dhe lidhet me detyrimet që shtetit shqiptar ka ndaj investitorit italian, trafikantit në kërkim ndërkombëtare Francesco Becchetti, i cili ka fituar të drejtën për të marrë një dëmshpërblim të majmë pasi fitoi gjyqin në Arbitrazh me qeverinë shqiptare.
Kryeministri Edi Rama deklaroi prillin e kaluar se Shqipëria “do të hapë probleme të mëdha” me këtë gjykatë, ndërsa shtoi se po analizohet edhe mundësia për të dalë fare nga juridiksioni i saj. “Shteti shqiptar nuk ka paguar asnjë qindarkë dhe se beteja me biznesmenin italian do të vijojë deri në fund. Shqipëria deri më sot nuk ka paguar asnjë kokërr leku. Sepse është një botë shumë e komplikuar e me shumë procedura dhe po bëhemi gjithnjë e më të aftë për ta përballuar presionin”, deklaroi Rama.
Ja si reagon Ministria e Jashtme
Por sa i takon këtij lajmi ka ardhur edhe një reagim zyrtar nga Ministria e Jashtme e Shqipërisë. Kjo e fundit përmes një deklarate të shpërndarë dje për mediat theksoi ditën e djeshme se ky është një lajm i pavërtetë dhe tërësisht abuziv dhe njëme qellime mashtrimi të mediave të kazanit.
Madje Ministria e Jashtme informon opinionin publik dhe median se në bazë të Konventës së Vjenës llogaritë bankare të MEPJ e të çdo përfaqësie diplomatike të Republikës së Shqipërisë gëzojnë imunitet diplomatik e kësisoj janë të pacenueshme në çdo rrethanë.
“Ministria për Evropën dhe Punët e Jashtme cilëson si të pavërtetë dhe tërësisht abuziv informacionin e publikuar në disa portale, mbi të ashtuquajturin “bllokim” të llogarive bankare të MEPJ apo përfaqësive diplomatike shqiptare, përfshirë Italinë.
MEPJ informon opinionin publik dhe median se në bazë të Konventës së Vjenës llogaritë bankare të MEPJ e të çdo përfaqësie diplomatike të Republikës së Shqipërisë gëzojnë imunitet diplomatik e kësisoj janë të pacenueshme në çdo rrethanë.
Çdo punonjës i MEPJ dhe i shërbimit më jashtë si në Itali e në çdo shtet tjetër ka marrë pagesën rregullisht, sikundër edhe atë të muajit korrik, konform ligjeve dhe kodit të punës”, thuhet ndër të tjera në njoftimin e Ministrisë së Jashtme të Shqipërisë. /Ekskluzive.al