Ilir Meta ka ndërprerë kontaktet me “non gratën” Sali Berisha dhe daljet në publik, pasi ka arritur qëllimin duke përdorur “Foltoren” për të ringritur Partinë e Lirisë. Kjo parti u katandis si mos më keq dhe futja e tij në koalicion me Berishën ishte një strategji e mirëmenduar.
Berisha i orientoi votat te koalicioni “Bashkë Fitojmë” dhe kjo ka bërë që Berisha në shumë bashki të jetë pakicë dhe Meta shumicë. Berisha mbeti mes katër rrugëve pas vendimit të Apelit që i hoqi vulën dhe gjeti shpëtim te Meta. Por ky i fundit duket se i ka vënë kushte. Meta lakmonte këshillat bashkiakë dhe në disa bashki të mëdha, në krye të listës ka vendosur militantët e tij.
Në bashkitë e mëdha ai madje e ka nxjerrë Berishën dhe pakicë. Në Tiranë, deri më tani Bashkë Fitojmë ka marrë 16 këshilltarë. Por nga këta 12 i ka marrë Partia e Lirisë dhe vetëm 4 Berisha. Edhe në Durrës, ka vijuar e njëjta skemë, ku PL ka marrë thuajse njësoj këshilltarë sa Berisha.
E njëjta taktikë është përdorur dhe në Vlorë, Korçë apo në Berat. Pra duket se Meta e ka arritur “fitoren” e tij. Ata militantë që i kishin mbetur pa punë i futi në këshilla dhe këtë në kurriz të “Foltores”. Ndërkohë Berisha tani jo vetëm që ka dështuar me marrjen e kryebashkiakëve. Por nuk ka asnjë forcë në këshilla bashkiakë, pasi thuajse në të gjithë vendin është pakicë, duke bërë që “Foltorja” të zhduket së ekzistuari.
Reagon Blushi
Nga ana tjetër, Meta po përpiqte me mish dhe me shpirt që të mbrojë interesat e partisë së tij, sikundër është kandidati i tij, Lefter Maliqi, i cili garoi më 14 maj në Bashkinë e Kuçovës i propozuar nga Partia e Lirisë. Dje sekretari i Përgjithshëm i PL, Tedi Blushi ka nxjerr denoncimin e anëtarit të PS-së lidhur me numërimin e votave. Blushi ka reaguar në një deklaratë për mediat pas publikimit të një video, ku një prej anëtarëve të PS-së të numërimit të votave në KZAZ-në e Kuçovës pohon se janë urdhëruar që të heqin nga kutitë e materialeve zgjedhore procesverbalin origjinal të numërimit të votave. Anëtari i PS-së ka pretenduar se është dhënë nga kryetari i bashkisë Kuçovë, Kreshnik Hajdari dhe është zbatuar nga kryetari e sekretari i KZAZ-së. Blushi theksoi se kjo është provë e rëndë e publikuar që vërteton, sipas tij, krimin e shëmtuar elektoral.
“Një tjetër provë e rëndë e publikuar së fundmi, vërteton krimin e shëmtuar elektoral dhe shtetëror që ndodhi me procesin e votimit dhe të numërimit në zgjedhjet vendore të 14 majit në Bashkinë e Kuçovës. Një prej anëtarëve të grupeve të numërimit të votave në KZAZ-në e Kuçovës përmes një video-dëshmie të publikuar në media pohon në vetë të parë se janë urdhëruar nga “Rilindja” të heqin nga kutitë e materialeve zgjedhore procesverbalin origjinal të numërimit të votave.
Në dëshminë e tij, anëtari që pretendon se ka qenë përfaqësues i subjektit politik Partia Socialiste thotë se urdhri për zhdukjen e këtij procesverbali është dhënë nga kryetari i bashkisë Kuçovë, Kreshnik Hajdari dhe është zbatuar nga kryetari dhe sekretari i KZAZ-së”, tha ai. Blushi theksoi se publikimi i kësaj dëshmie tronditëse vërteton krimin elektoral të ndodhur në Bashkinë e Kuçovës.
Ai i bëri thirrje SPAK që të reagojë menjëherë. “Siç edhe e ndoqët, anëtari “i penduar” i KZAZ-së në Kuçovë në dëshminë e thotë se nuk e ka zbatuar këtë urdhër dhe i ka ruajtur materialet origjinale duke shtuar se është gati t’ia vërë në dispozicion edhe institucioneve të drejtësisë për të dëshmuar atë çfarë ka ndodhur në të vërtetë në zgjedhjet e 14 majit në Bashkinë e Kuçovës.
Me publikimin e kësaj dëshmie tronditëse, që vërteton krimin e shëmtuar elektoral të ndodhur në Bashkinë e Kuçovës dhe jo vetëm, i bëjmë thirrje SPAK të reagojë menjëherë për të administruar këtë provë dhe për të nisur një hetim të thelluar. Arrestimet dhe lirimet nga “Drejtësia me regji”, devijimet, zhurmat mediatiake dhe përpjekjet propagandistike për të shmangur vëmendjen nga përgjegjësia direkte e Edi Ramës për krimet e shëmtuara zgjedhore të ndodhura më 14 Maj nuk mundet dot ta shfokusojnë vëmendjen nga kasaphana elektorale, që po faktohet çdo ditë”, tha ai.
Lefter Maliqi publikon video-dëshminë e komisionerit në Kuçovë
Ndërkaq, Lefter Maliqi, kandidati i koalicionit opozitar “Bashkë Fitojmë” për Bashkinë e Kuçovës ka publikuar dje në rrjetet sociale një tjetër video të asaj se çfarë ka ndodhur me procesin e votimit dhe të numërimit të votave në zgjedhjeve vendore të 14 majit të realizuara në këtë bashki.
Në video shihet e dëgjohet një prej anëtarëve të grupeve të numërimit të votave në KZAZ-në e Kuçovës, i cili pohon se ata janë urdhëruar që të heqin nga kutitë e materialeve zgjedhore procesverbalin origjinal të numërimit të votave.
Në dëshminë e tij, anëtari që pretendon se ka qenë përfaqësues i subjektit politik Partia Socialiste thotë se urdhri për zhdukjen e këtij procesverbali është dhënë nga kryetari i Bashkisë Kuçovë, Kreshnik Hajdari dhe i zbatuar nga kryetari dhe sekretari i KZAZ-së.
Po ashtu, dëshmitari thotë se nuk e ka zbatuar këtë urdhër dhe i ka ruajtur materialet origjinale duke shtuar se është gati t’ia vërë në dispozicion edhe institucioneve të drejtësisë për të dëshmuar atë çfarë ka ndodhur në të vërtetë në zgjedhjet e 14 majit në Bashkinë e Kuçovës.