Ekipi i njohur anglez i Manchester City do të ngrejë një akademi futbolli për të rinjtë e Durrësit, por jo vetëm. Mësohet se për këtë, kryeministri Edi Rama do të udhëtojë këtë të mërkurë drejt vendit ishullor, për të nënshkruar marrëveshjen me ekipin e Premier Ligës angleze.
Report TV thotë se kryeministri shqiptar do të shoqërohet në vizitën e tij drejt Anglisë nga ministrja e Arsimit dhe Sportit, Evis Kushi dhe kryetarja e Bashkisë së Durrësit, Emiriana Sako.
Fokusi i kësaj vizite do të jetë sporti, marrëveshja për të ngritur në Shqipëri një ndër akademitë më elitare të sportit që Rama lajmëroi dy ditë më parë nga qyteti bregdetar i Durrësit. Delegacioni shqiptar do vendoset në Manchester dhe bisedimet do të realizohen me ekipin e Manchester City.
Dy ditë më parë, Rama bëri me dije nga Durrësi se Akademia e një prej klubeve prestigjoze evropiane do jetë pjesë e sportit në qytetin bregdetar, kjo për të rinjtë e talentuar në futboll. Terrenet sportive që do të vihen në dispozicion të Akademisë së Futbollit do jenë pranë Universitetit “Aleksandër Moisiu”.
“SË SHPEJTI DURRËSI me një pol sportiv të nivelit ndërkombëtar. Vendi ku do të vendoset një nga akademitë më me famë të futbollit në botë – e cila i përket një klubi që s’mund t’ia themi emrin ende – një derë e hapur për talentet nga krejt rajoni që do të përgatiten për arenat e mëdha ndërkombëtare të sportit më popullor në botë”, njoftoi Rama dy ditë më parë.