Kryetarja e Misionit të ODIHR, organizata e OSBE që kujdeset për t’i vënë vulën certifikuese zgjedhjeve në shumë vende si Shqipëria, zhvilloi sot një takim të papritur me kryedemokratin Sali Berisha në selinë zyrtare të partisë kryesore opozitare, raporton noa.al.
Ky takim shihet nga disa, si një legjitimim që organizata evropiane i bën Sali Berishës, si kryetar të Partisë Demokratike, por edhe si një njohje e qartë e tij si pjesëmarrës integral në zgjedhjet e 14 majit.
Takimi Berisha-Glover, ishte i pari i këtij niveli që kur ish kryeministri u shpall non grata në prill 2021. Që atëherë, thuajse asnjë zyrtar i lartë evropian dhe i asnjë niveli amerikan, nuk janë takuar me të.
Në një komunikatë që lëshoi sot zyra e shtypit, thuhet se “kryetari i PD, Sali Berisha deklaroi sot pas takimit me shefen e Misionit të ODIHR, Glover, se kanë dështuar përpjekjet për ta lënë vendin pa opozitë”.
Ndërsa Berisha u shpreh: “Pata një takim me Shefen e Misionit të ODIHR, zonjën Gover ku i paraqita për dështimin e përpjekjeve për ta lënë vendin pa opozitë, vendosmërinë e PD për të çuar përpara proçesin elektoral sikurse e kemi shprehur para shqiptarëve.
Mendoj se zonja Glover ishte tek ne një takim për tu informuar mbi pikëpamjet faktet dhe zhvillimet sipas Partisë Demokratike të këtyre zgjedhjeve në Shqipëri.
Ne paraqitëm të gjithë problematikën që e konsiderojmë shumë të rëndësishme për një proces zgjedhor normal”.