Hapja e negociatave është objektivi kryesor i Shqipërisë, teksa pritet vendimi i 28 vendeve anëtare të BE në mbledhjen e Këshillit të Ministrave në 28 qershor.
Holanda është një shtet me të cilin Shqipëria po bashkëpunon në mënyrë të frytshme sa i përket çështjeve të drejtësisë, sigurisë, ekonomisë.
Ambasadorja e Shqipërisë në Holandë, Adia Sakiqi iu përgjigj interesimit të ATSH-së në lidhje me ecurinë e procesit të çeljes së negociatave dhe qëndrimit të Holandës.
“Në mënyrë të vazhdueshme janë zhvilluar takime me ministrinë e Jashtme holandeze, në mënyrë të veçantë me parlamentin holandez, si dhe janë mbajtur kontakte me përfaqësuesit e medias holandeze”, tha diplomatja shqiptare për ATSH.
Gjithashtu në këtë kuadër, ambasadorja thekson se, “kanë zhvilluar takime në Holandë me aktorë të ndryshëm të politikës Ministri i Jashtëm i Shqipërisë, Ministri i Bujqësisë, Ministrja e Drejtësisë, Ministri i Brendshëm, Kryetari i Bashkisë së Tiranës, zv/ Ministrat e Brendshëm dhe ata të Drejtësisë”.
Gjithashtu shton më tej Sakiqi, në Ministrinë e Jashtme të Holandës janë zhvilluar konsultime diplomatike bilaterale.
“Bashkëpunimi në fushën e luftës kundër krimit të organizuar midis autoriteteve policore të dy vendeve është rritur në mënyrë të ndjeshme dhe përpara një jave është firmosur “Letër of Intent” me Ministrinë për Sigurinë dhe Drejtësinë të Holandës”, evidenton diplomatja shqiptare për ATSH.
Gjithashtu, një punë intensive është bërë edhe sa i përket bashkëpunimit me shoqërinë civile holandeze e cila ka një zë të fuqishëm në vendimmarrjet politike, teksa thekson ambasadorja, “gjatë vizitave të ministrave në Hagë janë zhvilluar leksione dhe debate në NGO dhe think tank holandeze, të cilat kanë një zë të fuqishëm në vendimmarrjet politike”.
Ndërkohë ambasada ka zhvilluar edhe aktivitete kulturore për promovimin e Shqipërisë, teksa, “në ambientet e saj ka një Galeri Arti në të cilën zhvillohen vazhdimisht jo vetëm forume biznesi por edhe aktivitete kulturore për promovimin e vendit dhe imazhin”.