Lajmi se Serbia do të zhvillojë një stërvitje të përbashkët ushtarake me SHBA dhe një numër vendesh të NATO-s, ka alarmuar Kremlinin, i cili është shprehur se do t’i monitorojë më vëmendje këto manovra të përbashkëta ushtarake.
Një reagim të ashpër ndaj këtij vendimit të Serbisë kanë pasur edhe mediat ruse, të cilat kanë “kryqëzuar” presidenti serb, Aleksandër Vuçiç dhe qeverinë e tij.
Agjencia ruse e lajmeve “TopWar”, shkruan se vendimi për kryerjen e stërvitjeve ushtarake u mor nga qeveria serbe, pavarësisht pretendimeve të qytetarëve që janë të pakënaqur me një bashkëpunim të tillë ushtarak midis Beogradit, Uashingtonit dhe aleatëve të tij. Duke lënë të kuptohet se populli serb është kundër vendimit të marrë nga qeveria e Vuçiçit.
Ajo gjithashtu i kujtoi Serbisë edhe memorandumin e vendosur në shkurt të vitit 2022, ku kishte njoftuar ndërprerjen e çdo stërvitje ushtarake në territorin e saj, por që sipas medias ruse 1 vit më pas Beogradi e hodhi poshtë.
Mllefi i agjencisë ruse ka arritur deri aty sa në shkrimin e saj, i sjell në kujtesë Serbisë se ka pranuar të bëjë stërvitje me NATO-n, aleanca e cila çerek shekulli më parë e ka bombarduar Beogradin dhe ka lënë pasoja katasrofike në vend, që edhe sot nuk janë rikuperuar tamam.
Një reagim lidhur me stërvitjen ushtarak bëri edhe zëdhënësi i Kremlinit, i cili dukshëm i shqetësuar nga “grushti” që ju kishte dhënë aleati i tyre në Ballkan, tha se Moska do ta ndiqte situatën nga afër. Peskov tha gjithashtu se Beogradi aktualisht është nën një presion të paprecedentë, gjë që sipas tij e ka sjellë Serbinë në anën e atyre që përdorin qëndrime anti-ruse.
“Nëse flasim për stërvitjet, ne sigurisht që do t’i shikojmë ato nga afër. Beogradi aktualisht është nën një presion të paprecedentë për ta sjellë Serbinë në anën e atyre që përdorin qëndrime anti-ruse,” tha Peskov.
Kujtojmë se ministria serbe e Mbrojtjes njoftoi të mërkurën se Serbia do të zhvillojë stërvitjen e përbashkët ushtarake “Platinum Wolf” me një numër vendesh të NATO-s nga 16 deri më 30 qershor, pavarësisht moratoriumit të miratuar më parë nga qeveria e vendit për çdo stërvitje ndërkombëtare.
Ky vendim i Serbisë sigurisht që ka trazuar ujërat në Kremlin, pasi Beogradi ishte partneri i tyre strategjik në Ballkan, për të cilin kanë investuar miliona dollarë për ta mbajtur nën influencën e tyre. Por mesa duket lufta në Ukrainë ishte ndoshta një vendim i gabuar nga Moska, pasi “tentakulat” e saj të influencës ekonomike dhe gjeopolitike, po priten dita-ditës si pasojë e izolimit nga sanksionet Perëndimore.
Nga ana tjetër SHBA dhe aleatët e saj duke përfituar nga dobësimi i Rusisë, po mundohen sa më shpejt të jetë e mundur të joshin Serbinë që të ndryshojë kah. Cili do të jetë veprimi i rradhës i Kremlinit lidhur me këtë rast mbetet për tu parë, por një gjë është e sigurt; kjo lëvizje e Serbisë ishte një “goditje” e fortë për Rusinë, pothuajse të ”gjunjëzuar”./Pamfleti