Ervin Karamuço, që prezantohet nga mediat shqiptare si ekspert i sigurisë dhe shumë fushave të tjera, arriti të marrë vëmendjen e qindra mijëra njerëzve, kur shfaqi një fotografi të një monedhe 5 lekëshe, duke pretenduar se ajo është e vetmja monedhë, që ka rënë nga xhepi i rojes së ndjerë të Top Channel, Pal Kola, para se ai të ndërronte jetë nga sulmi me kallashnikov.
Historia synonte ti shtonte dozat e tragjizmit edhe pse vdekja e një njeriu, është mjaftueshëm tragjike pavarësisht se sa para ai ka në xhep, duke e pasqyruar Kolën si një person në varfëri ekstreme, në xhepat e të cilit gjendeshin vetëm 5 lek.
“Kam bërë fotografi i pari, monedhën që ra nga xhepi i të ndjerit Pal dhe ajo monedhë është kthyer në një simbol solidariteti te të gjithë njerëzit që besojnë te vlerat, humanizmi, që besojnë se jemi shumica kundër kriminalitetit”, tha Karamuço.
Por në fakt, “5 lekëshi i vetëm që ra nga xhepi i rojes”, i cili nuk dihet fare nga cili xhep ka rënë, duket më shumë një histori e ekzagjëruar. Këtë e ka konfirmuar gazetari Thimi Samarxhiu, i cili gjatë intervistës me Karamuçon, deklaroi se roja i ndjerë, nuk kishte në xhep 5 lek, por një shumë parash që policia i’a dorëzoi familjes.
“Në fakt profesor, fotoja juaj është bërë virale dhe ka bërë xhiron e rrjeteve sociale, më shumë simbolika, sepse në fakt, për korrektesë, nga burime zyrtare nga policia më thonë që në xhepin e të ndjerit janë gjetur mbi 20 mijë lekë të reja, të cilat më pas i janë dorëzuar familjes.
Vdekja e Pal Kolës, një person i pafajshëm dhe pa lidhje me objektivin e ngjarjes, është mjaftueshëm e trishtë dhe e rëndë, sa nuk ka nevojë për asnjë element të ekzagjëruar apo të sajuar, për ti dhënë ngjarjes më shumë dramacitet fals, apo për ti shtuar klikimet dhe vëmendjen personave që e shpërndajnë.