Antimafia italiane thotë se prej tre vitesh bashkëpunimi me autoritetet ligjzbatuese shqiptare është përforcuar në nivele të kënaqshme. Por, nuk ka qenë gjithmonë kështu.
Në hetimet e përbashkëta të dosjeve të bujshme që kanë çuar në burg dhjetëra persona këtej e matanë Adriatikut ka pasur edhe sabotim nga prokurorë shqiptarë. Këtë e konfirmoi në një intervistë për “Zona Zero prokurori i antimafias italiane, Françesko Xhianela.
Pyetje: Po, janë të paktën tri operacione që unë mbaj mend, KULMI, SHEFI dhe SHPIRTI. Tri operacione këto, falë të cilave kanë përfunduar në burg shumë persona në Shqipëri dhe në Itali. Por nga të gjitha këto operacione, vihen re lidhjet, sepse në një nga këto operacione është arrestuar madje edhe një prokuror. Domethënë, lidhjet, nga ajo çka ju shikoni dhe keni arkivuar, keni dokumentuar, lidhjet, pra, që kanë policët e korruptuar, prokurorët e korruptuar, por edhe të tjerë, a janë të forta?
Përgjigje: Ne u kemi sinjalizuar autoriteteve shqiptare disa gjëra që ishin shfaqur gjatë hetimeve tona. Ua kemi sinjalizuar atyre, u kemi dërguar kopje të dokumentacionit, kopje të përgjimeve, nga të cilat shfaqeshin, si të thuash, dyshime shumë të rënda kundrejt disa personave që duhej të përfaqësonin institucionet…ne nuk mund të procedojmë në Itali personazhe publike shqiptare, nuk ndodh kjo. Kjo ndodh në Shqipëri, edhe falë hetimeve tona, kështu që do të shohim se çfarë do të ndodhë në proceset që do të zhvillohen në Shqipëri.
Njëra prej dosjeve të hetuara nga pala italiane është dosja Shpirti. Pala italiane ka një të penduar në këtë dosje, që është Mariglen Shusha. Në dëshminë e tij, ai përmend në emër dy prokurorë, njëri Maksim Sota dhe tjetri Eneid Nakuçi, sot prokuror i SPAK./Top News