Shkencëtarët kanë zbuluar se bërthama e Tokës ka ndaluar së rrotulluari e madje mund edhe të ketë ndryshuar drejtim.
Një studim publikuar në “Natural Geoscience” thotë se bërthama e ngurtë e Tokës mund të përjetojë ndryshime në rrotullimin e saj çdo disa dekada. Shkencëtarët nuk mund të shohin direkt brenda bërthamës, por valët sizmike nga tërmetet e fuqishme dhe bombat atomike kanë treguar se bërthama mund të rrotullohet pak më shpejt se pjesa tjetër e planetit.
Në studimin e ri, vëzhgimet në valët sizmike nga viti 1960 deri më sot zbuluan se në 2009, modeli i valëve tregon që bërthama e brendshme mund të ketë ndaluar së rrotulluari rreth një dekadë më parë.
Të dhëna nga dy shpërthime nukleare tregojnë një pushim të ngjashëm rreth vitit 1971 dhe kjo i ka bërë shkencëtarët të besojnë se bërthama ndalon rrotullimin dhe ndërron drejtim pak a shumë çdo 70 vjet.
Kërkuesit mendojnë se kjo mund të jetë për shkak të fushës magnetike të Tokës që tërheq bërthamën e brendshme dhe e rrotullon, ndërsa forca gravitacionale e mantelit e tërheq në kahun e kundërt. Çdo disa dekada, një forcë fiton mbi tjetrën dhe kjo ndryshon drejtimin sipas të cilit rrotullohet bërthama.
Një tjetër shpjegim është se pushimet mund të shkaktohen nga ndryshimet në sipërfaqen e bërthamës së brendshme. Studimi i ri mund të hedhë më shumë dritë mbi natyrën misterioze të zemrës së Tokës dhe ndërveprimin e saj me shtresat e tjera.
Toka ka 4 shtresa kryesore, bërthamën e ngurtë në qendrën e saj, të rrethuar nga bërthama e lëngët, manteli dhe korja. Shtresa e brendshme përbëhet nga hekuri e nikeli dhe ka një rreze prej 1221 km.
Shkencëtarët janë optimistë lidhur me këtë sjellje të re të planetit dhe mendojnë se nuk ka arsye për t’u shqetësuar./tvklan.al