Kryetari i Bashkisë së Tiranës, Erion Veliaj ka hedhur dje akuza të forta në adresë të opozitës dhe veçanërisht “Foltores”.
Ndërsa ishte i ftuar në një studio televizive, zoti Veliaj u pyet edhe lidhur me përpjekjen e deputetëve të PD-së, Albana Vokshi dhe Gent Strazimiri, për të bllokuar punimet në rr. “Xhon Belushi”, për të cilët kryebashkiaku theksoi se janë të njëjtët personazhe që kanë bllokuar edhe punë të tjera në qytet.
“Është e njëjta zonjë e cila i ka humbur të gjitha betejat me mua për shpifje. Me paratë e gjyqeve ku zonja Vokshi është dënuar si shpifëse profesioniste janë blerë dhjetëra kompjuterë për shkollat e Tiranës. Zotëria tjetër, Strazimiri, mbahet mend tërë jetën e tij, edhe kur të dalë në pension, si njeriu që donte të prishte këndin e lodrave të fëmijëve, madje mori edhe pistoletën të protestonte kundër fëmijëve.
Ja ku është këndi i lojërave sot! Thirrja për të gjithë qytetarët është: Kujtoni atë shprehjen amerikane: kur vjen cirku në fshat, dalin të gjithë klounët që ta përshëndesin. Ardhja e fushatës është paksa si cirku në fshat dhe lloj-lloj klouni, i çdo lloji partie, del që të përshëndesë cirkun dhe shpifin”, deklaroi ai. Ndërkohë Veliaj sfidoi edhe rivalin e tij Belind Këlliçin.
“Të gjithë ata që garojnë i konsideroj jo kundërshtarë, janë të ftuar në këtë sofër të madhe të Tiranës për të ballafaquar idetë, por jo për të bllokuar punët. Së dyti, unë nuk jam as drejtori dhe as drejtoresha e “Harry Fultz”-it. Duhet të pyesni drejtorët e shkollave të mesme kush shkon në shkollë, kush lë shkollën, kush ka diplomë, kush nuk ka diplomë.
Këtu në Tiranë i keni, bëni detyrën serioze si media dhe pyesni – siç pyesni për mua për çdo gjë – pyesni edhe shkollat respektive, ose pyesni kandidatët çfarë shkollash kanë bërë. E treta, që është më e rëndësishme, unë nuk jam as Ilirjan Celibashi i KQZ-së, as merrem me formularët e dekriminalizimit. Kush gënjen nëpër formularë, do të duhet të pyetet respektivisht çdo institucion. Kam zero kuriozitet se çfarë bën secili”, nënvizoi Veliaj.