“Tentova të ndryshoj sistemin zgjedhor. Doja që të hapeshin listat e të fuqizonim qytetarin, jo të shkonim pas kryetarit.”
Kështu është shprehur Rudina Hajdari në “Intervistë” me Merita Haklajn ndërsa shpjegonte arsyet se përse kandidoi nën siglën e Nismës Thurje në zgjedhjet e 25 prillit.
Ish-deputetja e Partisë Demokratike tregoi sesi e gjendur pas dyerve të mbyllura të selisë blu, që drejtohej atëherë nga Lulzim Basha, u detyrua që të garonte me një logo tjetër edhe pse nuk do të donte të “ndahej” asnjëherë nga partia me të cilën është rritur.
Hajdari tregoi se tentoi që në zgjedhjet e 25 prillit të futej në listat e PD-së por ish-kryedemokrati Basha nuk e lejoi, edhe pse ajo tregon që tentoi “nga të gjitha frontet.”
“Fakti që u përjashtova nga PD, mu mbyllën dyert totalisht, tentova në zgjedhjet e 25 prillit të rifutesha në listat e PD-së. Kam pasur përpjekje në disa fronte, qoftë nga fronti familjar, politik, ndërkombëtar tentova të rifutesha dhe zoti Basha ishte kategorik në këtë pjesë.
Përgjigja e tij ishte se nuk do të pranonte asnjë nga opozita parlamentare. Ndërkohë, kjo nuk rezultoi e vërtetë. Kishte diçka që ishte e qartë personale. Kurrë nuk doja të garoja me një parti tjetër, por u ndodha në kushte të vështira”, tha Rudina Hajdari.
Tashmë që PD drejtohet nga Sali Berisha, Rudina Hajdari i është bashkuar sërish kësaj force politike.
Ajo thotë se tek Berisha pa reflektim ndërsa theksoi se ishin ndryshimet statutore dhe Kuvendet që PD mbajti në dhjetor që e bindën që ishte koha për t’u kthyer në selinë blu.
“Pas zgjedhjeve e pashë qartë që në PD, ishte e mbyllur e izoluar nga Basha. Nën siglën e Thurjes nuk isha komode. Kur pashë ngjarjet në Shqipëri, me Berishën me Kongreset e ndryshme që u bënë në dhjetor, ndryshimet e statutit që u bënë.
Shikoja që Berisha kishte reflektuar, që roli i kryetarit duhet të reduktohet. Kur Basha dha dorëheqjen dhe doli vendimi i Shkallës së Parë, vendosa të rikthehesha”, u shpreh ajo.
Për Rudina Hajdarin, kthimi në PD është një mënyrë për të çuar amanetin e të atit deri në fund:
“Si e bija e Azem Hajdarit nuk mund të isha larg PD-së në momente kritike.”