Ditën e djeshme u shënuan plot 22 vjet nga dhuna e ushtruar në vitin 1996 mbi anëtarët e opozitës së asaj kohe. Më 26 maj të atij viti u mbajtën zgjedhje, të cilat nxorën fitimtar Sali Berishën. Mirëpo opozita e asaj kohe, Partia Socialiste e quajti këtë proces zgjedhor të manipuluar, duke e akuzuar Berishën se kishte vjedhur votat me qëllim fitoren.
Për këtë arsye dy ditë më pas ata ngritën në protestë, por ky organizim u shndërrua në një ngjarje të dhunshme. Dyshohet se me urdhër të Sali Berishës shumë figura të njohura që ishin ngritur të protestonin, si: Namik Dokle, Paskal Milo, Servet Pëllumbi, Arben Imami, Pandeli Majko, etj., u dhunuan barbarisht.
Në lidhje me këtë ngjarje historike, reagoi dje për gazetën TemA ish-kreu i Shërbimit Informativ Shtetëror, Fatos Klosi, i cili zbuloi edhe detaje sesi u rrahën protestuesit.
“Është një ngjarje shumë e rëndë. Ishte një protestë për zgjedhjet që ishin mbajtur dhe që padyshim nga të gjithë u pranua që ishin zgjedhje të transformuara në krahasim me vullnetin e popullit dhe normalisht opozita e asaj kohe doli në një protestë në shesh.
Ishte një protestë e nisur absolutisht paqësore, ndërkohë që u prit shumë keq nga forcat e policisë dhe SHIK-u. Një kujtim dhe një ngjarje shumë e hidhur. PS, e cila në atë kohë ishte në opozitë u ngrit në protestë në një kohë kur gazetarët e huaj që kishin marrë pjesë në monitorimin e atij procesi zgjedhor ishin akoma në Tiranë dhe e panë nga afër shumë mirë se çfarë reprezalje e fortë u bë ndaj protestuesve.
Ndaj protestuesve u ushtrua dhunë e fortë, u masakruan mund të themi. U rrahën keq deputetë, figura shumë të njohura, personazhe të rëndësishëm, nuk ishin njerëz që po gjuanin me gurë”, tha ish-kreu i SHISH. Ai nënvizoi më tej se atë ditë u kapërcye kufiri normal.
Fatos Klosi theksoi në vijim të reagimi të tij se ngjarje të tilla ndodhin sepse Sali Berisha e ka dhunën metodë punë. Sipas tij, filozofia e Berishës për të marrë pushtetin dhe për të qëndruar në pushtet është duke u mbështetur tek grupet kriminale dhe tek “të fortët”.
“Filozofia e Berishës ka qenë e tillë. Filozofia e tij për marrjen e pushtetit dhe mbajtjen e pushtetit ka qenë ajo e dhunës, filozofia e mbështetjes mbi njerëzit e fortë, mbi grupet kriminale dhe prandaj ai sot, pasi i ka ikur nga dora kjo mundësi, ankohet që këto gjëra i ka marrë pala tjetër.
Ai kërkon të mbajë pushtetin me çdo kusht. Kjo ishte edhe arsyeja kryesore pse populli u acarua. Sigurisht shtysa u dha dhe nga rënia e firmave piramidale, por edhe kjo ishte një arsye shumë e fortë dhe një shtysë shumë e madhe. Në një kohë kur flitej për demokraci, ishte një pushtet represiv”, deklaroi ish-kreu i SHISH.
Ai shtoi se protestuesit u përballën me një situatë të tillë sepse Sali Berisha nuk mund të pranonte që të humbte atë rezultat zgjedhjesh që e kishte korrur me shumë përpjekje.
“Një ngjarje e tillë ndodhi sepse Berisha nuk e kishte parashikuar që në ato zgjedhje mund të dilte keq kështu që shumë pak ditë para zgjedhjeve ai mori masa shumë të forta në mënyrë që ato zgjedhje t’i fitonte dhe nuk donte në asnjë mënyrë që dikush të protestonte për cilësinë e zgjedhjeve.
Ai pretendonte që ato zgjedhje ishin legjitime dhe donte që të ruante pushtetin”, u shpreh ish-kreu i Shërbimit Informativ Shtetëror, Fatos Klosi.