Sasi të mëdha peshqish kanë ngordhur për shkak të tharjes së lumit të Kalasës në Sarandë. Tharja e lumit është bërë për shkak të shfrytëzimit të burimit të ujit nga hidrocentrali i SASAJT, i cili është në pronësi të biznesmenit Vasil Naçi.
Gazetari Flavio Qarri, me anë të një postimi në facebook shkruan se projekti i biznesmenit Vasil Naçi ka shkaktuar një krim mjedisor. Sipas gazetarit lumi i Kalasës tanimë është një varrezë e hapur masive për çdo gjallesë të tij dhe sigurisht i tharë.
‘Tokat, ekosistemi, biodiversiteti, agrokultura është një kujtim i të shkuarës së afërt, satelitët nuk janë ende në orbitë se do e kishin kapur këtë masakër (një nga funksionet do të jetë kontrolli tokës e ujit që të shmangen krimet mjedisore). Në Rrëzomë banorët janë rrëzë shfarosjes. Asnjë mundësi për të jetuar në fshat (nuk ka as ndonjë dyqan Agna aty pranë për t’i punësuar të gjithë)’.
Qarri shton se biznesmenët më të mëdhenj në Shqipëri nuk prodhojnë, asnjë vlerë të shtuar për industrinë tonë, prodhimin tonë.
‘Thashë dyqan se fjala fabrikë është herezi. Shikoni pak biznesmenët më të mëdhenj në Shqipëri. Për be asnjëri prej tyre nuk prodhon asgjë. Asnjë vlerë e shtuar për industrinë tonë, prodhimin tonë. Vetëm shfrytëzim dhe tregti. Zero input’.
Flavio Qarri ka ngritur një pyetje për biznesmenin Vasil Naçi, se për të qenë i suksesshëm, a ka vlerë morale morale dhe tregtare Hidrocentrali i Sasajt?
‘Më i famshmi, pikërisht zoti Naçi dhe leksionet e tij për jetë të suksesshme e biznes të mbrothët. Tani radha e dishepujve është kilometrike. Një pyetje për ta dhe zotin Naçi: A është vlerë morale dhe tregtare Hidrocentrali i Sasajt? A po sillni zhvillim për fshatrat e Sarandës? Lumi i Kalasës ju prishte punë dhe a flisni për impaktin ambiental në trajnimet e suksesit?’.
Ekspertit i mjedisit Çlirim Poda thotë se dëmet e shkaktuara nga mungesa e ujit janë kolosale dhe të parikuperushme.
“Ai problem është i mbartur. Dëmi real është që e gjithë fauna është e shkatërruar. Të vjen keq. Nuk reagon asnjë njeri, asnjë institucion. Ka inspektoriate të pyjeve. Të tokës”, tha specialisti.
Fshati Bajkaj duket se është më i prekur nga tharja e lumit. Fermerët thonë se prej disa vitësh po hasin të njëjtin problem me HEC-in, mungesën e ujit për vaditje.
Pas ankimit të banorëve, firma Sasaj, ka hapur një ditë më parë portat e hidrocentralit, por do të duhet shumë kohë për ta rikthyer lumin Kalasë në gjendjen e mëparshme. Banorët thonë se nëse kjo nuk ndodh atëherë do ta ndjekin cështjen në rrugë institucionale.