Arben Krajës nuk do t’i jepet mundësia për t’u rizgjedhur në krye të Prokurorisë së Posaçme kundër Korrupsionit dhe Krimit të Organizuar, kur mandati prej 3 vitesh të ketë përfunduar.
Socialistët, në emër të të cilëve ka folur kreu i grupit parlamentar, Taulant Balla theksojnë se për të plotësuar kërkesën e tij nuk do të preket Kushtetuta. Duke e “vulosur” kështu që mandati i tij nuk do të zgjatet, ashtu siç ndodhi me mandatet e dy organeve të Vetingut, KPK dhe KPA-së.
“Mund të vijë propozim nga një palë. Mund të vijë propozim nga një grup deputetësh. Por asnjë prej nesh ka të drejtë të ndryshojë thelbin e reformës. Nuk duhet të nxitojmë duke gabuar.
Ne nuk i kemi 84 vota dhe në këtë këndvështrim dëshira jonë është të gjejmë formulime të cilat krijojnë sa më shumë konsensus brenda Kuvendit”, deklaroi ai. Ndërkohë grupi teknik do të vlerësojë kërkesat dhe raportimet e institucioneve të drejtësisë, të cilat kanë adresuar një sërë propozime ligjore për të përmirësuar punë e tyre.
Një nga çështjet që pritet të merret një vendim ka të bëjë me magjistratët, që viti i tretë i tyre nga praktikë të cilësohet vit pune. Por ndryshimet e ligjeve të drejtësisë PS i nevojiten edhe votat e PD, prandaj mazhoranca ka reflektuar që të mos ja mbyllë derën përfundimit Enkelejd Alibeaj për të ndryshuar hartën territoriale.
“Ftesa ime për kreun e grupit parlamentar të PD-së, Enkelejd Alibeaj, në frymën e gjetjes së dialogut të të zgjedhurve që na bashkojnë të gjithë le të ulemi dhe ti shohim një nga një. Kemi dhe pak kohë por nuk kemi shumë kohë në dispozicion”, nënvizoi Balla. Megjithatë ajo që pritet të ndajë apo bashkojë palët në Parlament do të jetë votimi i Avokatit të Popullit si dhe Reforma Territoriale.