“Filmat e prodhuara nga ish-Kinostudio Shqipëria e Re duhet të ndalohen me ligj si pjesë e propagandës komuniste”, kjo kërkesë është pjesë e nismës së depozituar në Kuvend nga grupi i demokratëve që drejtohet nga Enkelejd Alibeaj, në kuadër të dekomunistizimit.
“Propagandë për regjimin totalitar komunist është çdo akt propagande, i kryer me çdo mjet, që mohon, minimizon në mënyrë të ndjeshme, miraton ose justifikon natyrën kriminale të regjimit totalitar komunist, të veprimtarisë së PPSH dhe të organeve të diktaturës komuniste”, thuhet në një nga pikat e draftit.
Në lidhje me këtë çështje në emisionin Shqip nga Rudina Xhunga në Dritare TV, më herët regjisori dhe aktori i njohur Mevlan Shanaj ka folur për filmin shqiptar para viteve 90-të. Shanaj ka komentuar edhe nismën e deputetëve të PD-së për ndalimin e filmave të para viteve 90-të. Shanaj shprehet se kjo nuk është një nismë e PD por e disa e individëve me pasione dhe jo me formatimin e duhur kulturor të cilët kujtojnë se duke lëshuar deklarata të tilla fitojnë kredibilitete.
Në rastin kur elementët e komunizmit janë të trupëzuar, si në rastin e lapidarëve, kërkohet shembja ose transformimi i tyre brenda tre muajve nga konstatimi.
“Në rastin, kur këto simbole janë të trupëzuara me sende të paluajtshme, atëherë institucioni përgjegjës për administrimin e sendit të paluajtshëm, brenda 3 muajve nga konstatimi, merr masat e duhura për eliminimin e tyre ose nëse është rasti për transformimin fizik në atë masë që simboli i transformuar të mos shërbejë për qëllime të propagandës së regjimit totalit komunist”, thuhet në draft.