Shqipëria do të përfitojë nga paketa prej 2.2 miliardë dollarësh që SHBA do të japë për të forcuar kapacitetet ushtarake të shteteve partnere. Duke qenë se kërcënimi rus po rritet përtej Ukrainës, Uashingtoni ka vendosur të blindojë vendet aleate me armatime dhe materiale ushtarake.
Ka qenë Sekretari i Shtetit, Anthony Blinken, ai që ka njoftuar në një takim të NATO, se SHBA do të mbështesë aleatët dhe partnerët me një paketë të re ndihme. Në paketë do të përfshihen: Shqipëria, Bullgaria, Kroacia, Çekia, Estonia, Greqia, Letonia, Lituania, Mali i Zi, Maqedonia e Veriut, Polonia, Rumania, Sllovakia, Sllovenia dhe partnerët: Bosnje-Hercegovina, Gjeorgjia, Kosova, Moldavia dhe Ukraina.
Lidhur me këtë deklaratë të Sekretarit Blinken, ka reaguar edhe ambasadorja amerikane në Tiranë Yuri Kim. Ajo ka thënë se SHBA do jetë krah aleatëve të saj. “SHBA do të bëjë atë që është e nevojshme për të mbrojtur dhe forcuar aleatët dhe partnerët tanë”, shkruan ambasadorja.
Sa i takon paketës financiare, pjesa më e madhe do shkojë për Ukrainën, rreth 1 miliard dollarë. Pjesa tjetër do jetë për shtetet e tjera.
“Ndihma ka për qëllim të përdoret për mbrojtjen e sovranitetit, modernizimin e forcave të sigurisë, përmirësimin e partneritetit me aleancën ushtarake të NATO-s dhe forcimin e kapaciteteve për “t’iu kundërvënë ndikimit rus dhe agresionit”, tha një zyrtar amerikan.
Ndihma amerikane vjen në formë të granteve dhe kredive që do të lejojë shtetet të blejnë armë dhe pajisje mbrojtëse të prodhuara në SHBA.
Kohët e fundit Rusia ka vënë në shënjestër Ballkanin. Kapja e spiunëve në uzinën e Gramshit ka shqetësuar dhe amerikanët, të cilët po mundohen të marrin masa për të mos lejuar që Moska të depërtojë në rajon. Putin po tenton të përdorë Serbinë dhe Bosnjën për trazira, por duket se SHBA është një hap para.