Dje janë mbushur plot 2 javë nga momenti kur Presidenti i Shqipërisë, Bajram Begaj u betua në Kuvend e Shqipërisë dhe më pas hyri zyrtarisht në zyrën e Kreut të Shtetit, duke zëvendësuar kështu në këtë post Ilir Metën.
Por siç duket Presidenti Begaj e ka marrë me qetësi plotësimin e stafit të tij, me njerëz të besuar më të cilët do të drejtojë Presidencën në 5 vitet e ardhshme. Megjithatë disa emra kyç Begaj duket se tashmë i ka vendosur. Gazeta “SOT”, ka mësuar se tashmë Presidenca ka një Sekretar të Përgjithshëm të ri, një Drejtor Kabineti të ri si dhe disa këshilltarë të rinj.
Kështu mësohet se Sekretari i Përgjithshëm i Presidencës do të jetë Florjan Kali. Ai e ka mbajtur këtë post më herët në Ministrinë e Mbrojtjes, ku ka bashkëpunuar me Presidentin e sotëm, kur Begaj drejtonte ushtrinë shqiptare. Ndërkohë, kabinetin e Presidentit do ta drejtojë Eduard Seitaj. Ai ka qenë Sekretar i Përgjithshëm në ministrinë e Transporteve në kohën e Edmond Haxhinastos.
Valter Ibrahimi do të jetë Këshilltar Diplomatik, një zyrtar me një karrierë të gjatë që është rekrutuar në Shërbimin e Jashtëm shqiptar në dhjetor 1992. Ndërsa Fatmir Çela do të jetë një tjetër këshilltar i Presidenti. Po ashtu, Begaj ka ftuar edhe dy gazetare për të ndërtuar ekipin e tij të komunikimit. E para është Lira Çanga, e cila 10 vitet e fundit ka punuar në OSBE.
Tjetra, është Alisa Demollari, e cila ka qenë zëdhënëse e disa ministrave në shëndetësi e drejtësi, gjatë qeverisjes Rama-Meta. Nga ana tjetër, gazeta “SOT”, ka mësuar se Presidenti i Republikës së Shqipërisë, Bajram Begaj është duke zhvilluar të tjera rekrutime deri në plotësimin e ekipit të tij.
Kujtojmë se Bajram Begaj u ul në karrigen e Kreut të Shtetit, pas detyrës së tij të lartë si shef i Shtabit të Përgjithshëm të Forcave të Armatosura, pasi Parlamenti e votoi atë në qershor me 78 vota pro.
Emri i tij për të qenë presidenti i tetë me radhë i shtetit erdhi me bekimin e kryeministrit Edi Rama, i cili zgjodhi përsëri modelin e ushtarakut, duke iu referuar Alfred Moisiut, që ai e cilësoi një sukses. Bajram Begaj (55), ka përfunduar studimet pranë Universitetit të Tiranës, Fakulteti i Mjekësisë, Dega Mjekësi e Përgjithshme dhe është titulluar oficer aktiv në specialitetin “Mjekësi” në vitin 1998.
Edhe karriera e tij në ushtri lidhet në pjesën më të madhe me profesionin e mjekut. Para se të merrte detyrën e shefit të Shtabit të Përgjithshëm të Forcave të Armatosura, në vitin 2020, për një periudhë trevjeçare ka shërbyer në detyrën e komandantit të Komandës së Doktrinës dhe Stërvitjes.