Nga Ardit Rada
Mijëra shqiptarë kanë ndjekur mbrëmjen e së hënës pjesën e dytë të telenovelës ‘Dhe i vetëm, trim në luftë’. Bëhet fjalë për vijimin e dëshmisë së Albert Veliut, të njohur fillimisht si “Bashkëpunëtori X”, më pas si “Dëshmitari X”, si trafikanti i dënuar më parë, apo si i arratisur i mbetur në tentativë.
Partia Demokratike prej pak ditësh ka paralajmëruar vijimin e audio-përgjimit ku pretendon se është përfshirë vëllai i ministrit të Punëve të Brendshme. Nga ana tjetër, paraardhësi i Xhafajt në detyrë, Flamur Noka, po sot deklaroi për ‘bomba’ të pareshtura që do të zbulojë kjo audio.
I transmetuar në emisionin ‘Ajsberg’, materiali nuk përmbante më as dëshmi. Qoftë edhe të rreme. Ishte një reportazh rreth Tragjasit të Vlorës ku Veliu së bashku me gazetarin pyesin banorët e fshatit për të blerë drogë. I pari u shfaq kryeplaku që deklaronte se vetë nuk kishte.
I dyti një kalimtar që tha se nuk merrej më, pasi sapo kishte dalë nga burgu për atë punë. Dhe audio e PD-së në asnjë moment nuk nxori se ku u blenë ato 20 kilogramët e “Babales” që u nis për 100, por nuk i dilnin lekët…
Partia Demokratike ka nisur qysh në krye të herës një vorbull në filxhanin e kafesë, nga falli i të cilit presin të gjejnë të ardhmen. Një keqinterpretin i qëllimshëm i videos së parë, që vijon me një të dytë të nivelit qesharak.
Së pari, PD ka hedhur akuzën se Agron Xhafaj merret me trafikim lëndësh narkotike. Krijuan në media idenë se Xhafaj e shiste, por në fakt Babalja e kishte gjetur në vend tjetër dhe nga Xhafaj kërkonte vetëm t’i hapte detin e të kalonte i qetë. Së dyti, video e sotme nuk provoi se Babalja është takuar me Xhafajn.
Dëshmitari i PD e kërkon në lokal, e kërkon në telefon, e kërkon rrugëve. Flet në telefon me të, por zëri i Xhafajt nuk dëgjohet sa për ta krahasuar me atë të videos së parë.
Dhe së treti, emisioni mbyllet me lajmin ‘bombë’! Mediat sot kanë gënjyer, gazetari deri mesditën e së hënës nuk është thirrur në Prokurori ndryshe nga çfarë kanë shkruar 4-5 portale.
Për të na kursyer të hënën para ekranit, pasi kalojmë në punë orë të tëra para kompjuterit, na e thoni sa më parë nëse ka pjesë të tretë.
Ose zhvendoseni transmetimin të dielave dhe konkurroni “Portokallinë”.
PS: Ai Ermali ku është?