Grykësia e VIP-ave në Shqipëri apo drejtuesve të emisioneve në televizionet kombëtare shqiptare, është jashtë çdo imagjinate.
Në mungesë të një kontrolli nga autoritetet përgjegjëse që duhet t’i ndëshkojnë për skema të pastra mashtrimi, në media dhe rrjete sociale ka nisur një abuzim me besimin e shikuesve të saj apo ndjekësve të personazheve publik, të cilët të paskrupullt për të fituar para në kurriz të shëndetit të të mashtruarve reklamojnë dhe shesin produkte të skaduara apo të dëmshëm për “viktimat” e tyre potencial.
Në fund i dëmtuar mbetet gjithmonë konsumatori, i cili nisur nga besimi që kanë krijuar nga këta VIP-a, konsumojnë produkte pa bërë një herë një kërkim se sa i dëmshëm apo i dobishëm është ai për organizmin e tyre.
Rasti në fjalë nuk bënë përjashtim, pasi çaji magjik që “dobëson” VIP-at, edhe ata që nuk kanë nevojë për të hequr kilogram, në fund doli një flluskë sapuni e madhe.
Nga investigimi i bërë nga gazetarët e emisionit “Piranjat”, rezultoi se çaji i dobësimit që reklamohet aq shumë nga vip-at shqiptarë është një mashtrim i madh. Këtë e pranoi edhe vetë pronari i kompanisë që tregton Açai One në Shqipëri, Klajdi Hoxha.
Hoxha në kamerën e fshehtë pranoi se: “Ne nuk presim dot kupon tatimor deri në momentin që ti nuk merr pakon, sepse se nuk arkëtojmë lekë, ne bëjmë shitje online. Açai është mbarim, Açai ka vdek. Është jashtë tregut, nuk ka më. Ne nuk shesim më Açai One. Açai One është ca ka ngel kthime.”
Hoxha pa pikën e turpit pranon se ka gënjyer për efektet e dobësimit të produktit, konsumatorët por edhe personat e kontaktuar dhe kompanitë që reklamonin produktin në këmbim të shumave monetare.
Nga investigimi mësohet se në kutinë e ambalazhit të Açai One, pavarësisht fletëpalosjes që është në shqip, vërehet se mënyra e përdorimit të pilulës nuk është përkthyer në shqip.
Asnjë nga informacionet që përdoren për të shitur çajin nuk gjendet në fletëpalosjen e produktit që tregtohet në Shqipëri: “Suplement ushqimor. Merrni 1 ose 2 kapsula çdo ditë me pak ujë. Për rezultate sa më të mira merren me stomak bosh. Kapsula përmban 200 mg, e barabartë me 2000 mg frut të thatë açai.”
Aktiviteti tregtar i drejtuar nga Klajdi Hoxha rezulton të jetë i pezulluar që nga 21 nëntori i 2021-it. Por, pavarësisht kësaj shitjet vazhdojnë çdo ditë në shkelje të rëndë të ligjeve të shtetit.
Madje, gazetarët e emisionit shkuan në Barcelonë për të zbuluar më shumë rreth kësaj kompanie, por ajo që vërtetuan ishte se “Luminesem” nuk ekziston në adresën e publikuar në Shqipëri. Në vend të kompanisë së “famshme” gjetën një dyqan të pastrimit kimik. Pas disa orë kërkimesh, gjetën dhe një pikë tregtimi të pilulave por të ndryshëm nga ambalazhi në Shqipëri.
