Ish-kreu i SHISH, Fatos Klosi, ka deklaruar se ish-kryeministri Sali Berisha është një politikan i çmendur.
Në një prononcim për gazetën “SOT”, i pyetur se si sheh peticionin që është bërë kundër ambasadores së Shteteve të Bashkuara të Amerikës Yuri Kim, ai u shpreh se më i interesuari për të bërë peticion kundër Kim është Berisha.
Ai deklaroi, se këto i duken veprime absurde.“Më i interesuari mendoj se është Berisha. Më duket se kanë gjetur rrugën më të gabuar, sepse është thënë gjithmonë që ambasadorët nuk flasin kurrë nga vetja e tyre, ata janë thjesht përfaqësues të Departamentit të Shtetit aq më shumë që për këtë ambasadore ka pasur shumë akuza të kësaj natyre dhe jam shumë i sigurt që ajo ato që thotë tregohet shumë më e kujdesshme.
Vetëm që ajo nuk tregon e-mailet që ka marr, sepse do ta thjeshtonte shumë këtë punë, por që kjo nuk bëhet. Të ankohesh nga Departamenti i Shtetit që ne e kemi konsideruar partnerin tonë strategjik kryesor dhe dihet nga të gjithë që Shtetet e Bashkuara kanë qenë vendi që e kanë mbështetur më shumë Shqipërinë. Më duken veprime absurde këto që bëhen dhe mendoj se Berisha e ndjen veten keq.
Është i çmendur, por me këtë tregon se është akoma më i çmendur”, tha ai. Ndër të tjera, ai deklaroi se pas peticionit kundër ambasadores mund të fshihen mbështetësit e Berishës. Ai deklaroi se ai filloi që të sulmonte Amerikën kur iu prekën interesat.
“Se di sepse nuk ja mban që të thotë se është ai sepse do të ishte shumë e rëndë pastaj, ai ka qenë kryeministër dhe president i vendit she ka pasur marrëdhënie shumë të mira me Shtetet e Bashkuara të Amerikës dhe tani që iu prekën interesat e tija, ai bënë gjëra të tilla. Me siguri do të dal se e organizojnë dashamirësit e tij, mendoj se është e paarsyeshme”, tha ai.
Klosi: Berisha duhet të hetohet nga SPAK
Ndërkohë, i pyetur se nëse ish-kryeministri Sali Berisha duhet të hetohet nga SPAK duke qenë se është shpallur “non grata” nga Shtetet e Bashkuara të Amerikës, Klosi u shpreh se po. Sipas tij, shpallja e Berishës “non grata” nuk është bërë pa prova dhe se SPAK duhet të gjej edhe prova të tjera.“Unë mendoj se po.
Duhet që ta trajtojnë, pastaj arrijnë që të gjejnë prova apo nuk arrijnë që të gjejnë prova për të hapur një proces është tjetër gjë pastaj. Duhet që të kërkojnë ndihmë gjithandej, megjithëse për mua ka prova plot, por që është detyra dhe përgjegjësia e tyre. Unë jam i sigurt që shpallja e Berishës “non grata” nuk është bërë pa prova dhe nuk është bërë pa argumente dhe është detyra e SPAK që ti gjej këto prova, por të gjeje edhe prova të tjera të cilat nuk i kanë Shtetet e Bashkuara të Amerikës sepse ne e njohim më mirë se ata.
Mjafton që SPAK të merret me 11 janarin, se pse u vranë ata njerëz në bulevard dhe do dal që urdhrin vetëm ai mund ta jepte sepse ushtarakët e dinë që arma përdoret për vetëmbrojtje ose kur cenohen interesa të mëdha, është dashur një urdhër shumë i lart dhe jam i sigurt që e ka dhënë Berisha, sepse Basha nuk guxon me dhënë urdhra të tilla sepse ai ministër i Brendshëm ishte”, tha ai./ Sidorela Braçja