Agron Duka është i bindur se Edi Rama e ka të caktuar tashmë në kokën e tij emrin e Presidentit të ardhshëm, por pohon se në parim do të ishte dakord të votonte një kandidaturë mbi palët, nëse negociatat me mazhorancën do të ishin të sinqerta.
“Unë personalisht jam gati që të votoj një kandidaturë që është me integritet dhe që mendoj se e bën mirë rolin e presidentit. Dëshira imë do ishte të ishte nga e djathta sepse ekuilibrohet pak pushteti, por ndoshta edhe jashtë politikës”.
Në një intervistë për A2 CNN, kreu i Partisë Agrare Ambientaliste pohon se i qëndron besnik frontit opozitar, pavarësisht problemeve të brendshme mes demokratëve. “Bashkëpunoj me këdo që merr PD”, tha ai.
Por a vështirëson të ardhmen e opozitës konflikti mes Berishës dhe Uashingtonit?
Fatmir Mediu, ndër aleatët më besnikë të ish-kryeministrit, thekson nevojën e gjetjes së rruge komunikimi me SHBA. Sipas Mediut, opozita duhet të ketë një raport të qëndrueshëm si me SHBA, ashtu edhe me përfaqësuesit e tyre në vendin tonë.