Nga Memo Aliaj
Që të mos i mohojmë meritat si paradhës besimtarësh, Ilir Meta i ndjek festat fetare dhe në çdo rast të tillë, jep edhe dekorata për baballarë, dervishë, hoxhallarë e myhup teqeje.
Aq shumë e ka bërë pjesë të jetës këtë punën e sajdisjes se teqeve e tyrbeve, sa ua ka futur në gjak edhe drejtuesve të lartë të partisë, të cilët e konsiderojnë Ilir Metën, si “Baba Likja” i LSI dhe i bëjnë “duva e temena”, duke u përulur sa herë ai ai kalon, apo del para tyre, aq sa duket sikur kanë përballë Baba Mondin!
Në fakt, “Baba Like Floriri” i ndjek dhe i zbaton aq shumë adetet fetave fetare, sa tregon se është një bektashi i denjë, paçka se shumë të “paudhë” e quajnë… batakçi! Kështu ndodhi në “Tyrben LSI” edhe ditën e nisjes së muajit të Ramazanit, kur “Baba Like Floriri” pasi la në shtëpi disa porosi për lëvizjen opozitare, shkoi t’i ftonte “besimtarët” (deputetët) të nisnin agjërimin, si mundësi për të pasur mirësi, begati e pastrim shpirti nga mëkatet, siç ka bërë edhe ai në këto 28 vite në politikë e prej faljes së mëkateve, i janë shtuar pasuritë.
Në fillim, “besimtarët” (deputetët) e panë si me habi ish-kryetarin e tyre, por pastaj u bindën dhe nisën ritin. Sapo “Baba Like Floriri” hyri në “Tyrbe” (LSI), të gjithë u ngritën nga karriget. Kur ai kaloi para tyre, për t’u ngjitur në podium, ata u përnjën para tij, mes tyre edhe profesor të cilët i bëjnë “amin”… mandatit të deputetit!