Ilir Meta ka vendosur të marrë masa pas shtimit të konfliktit në Ukrainë. Pas thirrjeve të ish-kryeministri Berisha pak ditë më parë që të nisë angazhimi, dje Meta është vënë në lëvizje.
Presidenca njoftoi se presidenti priti në takim Ministrin e Mbrojtjes, Niko Peleshi dhe Shefin e Shtabit të Përgjithshëm të Forcave të Armatosura, Gjeneral Major Bajram Begaj.
“Presidenti i Republikës Ilir Meta u takua sot me Ministrin e Mbrojtjes Niko Peleshi dhe Shefin e Shtabit të Përgjithshëm të Forcave të Armatosura, Gjeneral Major Bajram Begaj. Gjatë takimit u nda shqetësimi i përbashkët me të gjithë partnerët tanë të NATO-s për kërcënimin e një agresioni të mundshëm rus ndaj Ukrainës, që do të ishte një shkelje flagrante e të drejtës ndërkombëtare.
Presidenti Meta nënvizoi rëndësinë e koordinimit sa më të efektshëm me Aleancën, si dhe marrjen e masave për vijimin e reformave në funksion të forcimit të mëtejshëm të kapaciteteve tona mbrojtëse. Në këtë kontekst, u vlerësua edhe plotësimi dhe fuqizimi i gjithë zinxhirit komandues në Forcat e Armatosura, në përputhje me sistemin gradë-funksion”, tha Presidenca.
Ajo që bie në sy është se në asnjë moment Meta nuk ka përmendur SHBA, por përmend vetëm NATO. Qëndrimi tij vjen në një kohë kur janë shtuar tensionet me amerikanët. Njësoj si Berisha, edhe Meta ka nxjerrë kartën e anti-Rusisë.
Kohë më parë ka pasur shumë zëra se presidenti ka flirtuar me rusët dhe kjo është vënë re në distancimin që i kanë bërë amerikanët në çështjet ushtarake. Presidenti prej disa ditësh ka dalë kundër Moskës për çështjen e Ukrainës, duke dashur të fitojë zemrat e amerikanëve.