Thellohet përplasja mes Presidencës dhe Kuvendit të Shqipërisë. Gjatë kësaj jave Gjykata Kushtetuese zhvilloi seancën e fundit sa i takoi vendimit të Parlamentit për shkarkimin e presidentit Ilir Meta në detyrë, ndërkohë që është tërhequr dhe pritet të japë vendimin brenda një muaj.
Por presidenti Meta nuk pranon asnjë prej akuzave të ngritura nga Parlamentit kundrejt tij, ndërsa akuzon këtë të fundit se ka shkelur ligjin qysh kur u ngrit komisioni hetimor për të, rreth një vit më parë.
Për rrjedhojë, kreu i shtetit ka vendosur që të padisë Kuvendin e Shqipërisë në SPAK dhe Prokurorinë e Përgjithshme. Këtë lajm zoti Meta e bëri publike dje gjatë një konference për shtyp.
“Do të dorëzojmë padinë për veprat penale të kryera në bashkëpunim, falsifikimit të dokumenteve parashikuar nga neni 186 i Kodit Penal. Sapo ky kallëzim të depozitohet në Prokurorinë e Posaçme dhe në Prokurorinë e Rrethit Gjyqësor Tiranë, menjëherë do ta publikojmë të plotë në faqen zyrtare të institucionit të Presidentit të Republikës”, deklaroi ai.
Ndërkohë disa orë pas kësaj konference, Presidenca ka zbardhur edhe kallëzimin penal që presidenti Ilir Meta depozitoi ditën e djeshme në SPAK dhe prokurorinë e Tiranës kundër Kuvendit të Shqipërisë për falsifikim dokumentesh. Sipas Metës, Parlamenti ka manipuluar provat e paraqitura në Gjykatën Kushtetuese për shkarkimin e tij.
Madje në dokumentin prej 16 faqesh Kuvendi i Shqipërisë akuzohet nga Presidenca se ka dhunuar hapur parimin kushtetues të shtetit të së drejtës të përcaktuar në nenin 4/1 të Kushtetutës, por njëkohësisht duke shkelur në mënyrë flagrante dhe të përsëritur Rregulloren e funksionimit të tij, Kuvendi ka dhunuar njëkohësisht dhe nenin 75, pika 2, të Kushtetutës, ku përcaktohet se Kuvendi organizohet dhe funksionon sipas Rregullores së miratuar nga shumica e të gjithë anëtarëve.
Po ashtu, në kallëzim shpjegohen ‘shkeljet’ e pretenduara të Kuvendit, ndërsa kërkohet verifikim e hetime dhe vënien para përgjegjësisë të personave të përfshirë ‘në të gjitha nivelet hierarkike administrative të Kuvendit të Shqipërisë’ e po ashtu edhe të deputetëve që kanë ndjekur çështjen në komisionin hetimor për shkarkimin e Metës.
Kuvendi i rrëzon pretendimet Presidencës
Por menjëherë pas këtij kallëzimi ka ardhur dhe reagimi i Kuvendit të Shqipërisë, i cili shprehet se pretendimet e presidentit Ilir Meta nuk qëndrojnë. Përmes një deklarate të shpërndarë për mediat, Kuvendi hedh poshtë akuzat e Metës për manipulim apo falsifikim dokumentesh.
“Në respekt të pavarësisë së institucioneve kushtetuese, duke qenë se Gjykata Kushtetuese është tërhequr për të marrë vendim, Kuvendi respekton heshtjen dhe nuk bën komente për rastin në fjalë.
Për sa i takon pretendimeve të Presidentit të Republikës për manipulim ose për falsifikim, me përgjegjësi të plotë sqarojmë se këto pretendime nuk qëndrojnë. Kuvendi i Shqipërisë, në datën 4 shkurt 2022, ka depozituar pranë Gjykatës Kushtetuese dokumentacionin zyrtar ligjor që lidhet me çështjen në shqyrtim”, thuhet në reagimin e Kuvendit. /Rigels Seliman