Foto-fakte/ Fabrika dhe produktet duhet të jenë bllokuar deri sa të përfundojë hetimi analitik i produkteve në Itali, mirëpo 3 falsifikatorët e kësaj firme, Piro Karanxha, Nikolla Gjoni e greku Antonios Ouzas, lejohen të vazhdojnë aktivitetin prodhues e tregtues dhe nuk procedohen nga policia, pasi kësaj i kanë dhuruar pako me ushqime, por kanë dhe lidhje me kryeministrin Rama e deputetët zonal Çuçi-Kumbaro, të cilët i kanë mbështetur në fushata zgjedhore me vota, ndihma ushqimore e sponsorizime
Pas denoncimeve me prova konkrete të bëra nga “Pamfleti”, institucionet ligjzbatuese kanë nisur veprimet administrative, për bllokimin e bulmetrave të firmës “Gjirofarma” me qendër në Vrisera-Gjirokatër.
Burime nga Ministria e Ekonomi-Financave, thonë se Drejtoria e Doganave ka bllokuar eksportin e produkteve të qumështit, që “Gjirofarma” çon në SHBA, Greqi, Bullgari, Mali-Zi, Kosovë e Maqedoni.
Shkak është bërë gjetja e fekaleve, kimikateve, qumështit pluhur e vajit të palmës te qumështi, Kosi, Salca e Kosit e disa produkte të tjera, të cilët tre mashtruesit e kësaj firme Piro Karanxha, Nikolla Gjoni e greku Antonios Ouzas, i deklarojnë në etiketa, si prodhime me qumësht nga kullotat natyrale të Gjirokastrës.
Në fakt, rezultoi se përveç se të manipuluara me përbërës të tjerë të rrezikshëm për shëndetin e pa vlera ushqyese, produktet e “Gjirofarma” kanë dhe përmbajtje fekale, marrë bashkë me ujin e të pa kontrolluara që kjo firmë përdor gjatë prodhimit.
Po kështu, Drejtoria e Hetimit Doganar, ka bllokuar edhe futjen në Shqipëri, të qumështit e bulmetrave me logon “Gjirofarma-Gjirokastra”, por që faktikisht prodhohen e ambalazhohen te fabrika “AD IMLEK” në Beograd, ndërsa në treg hidhen sikur janë prodhuar në Gjirokastër.
Ndryshe nga shefat e doganës, po veprojnë shefat e Autoritetit Kombëtar të Ushqimit, të cilët qysh prej datës 12 janar 2022, kanë deklaruar se kanë bllokuar fabrikën “Gjirofarma” në Gjirokastër, magazinat në Tiranë dhe kanë hequr bulmetrat e saj nga tregu.
Por faktikisht, me lejen e shefave të AKU, fabrika “Gjirofarma” po vazhdon punën, ndërsa produktet me fekale janë akoma në tregun shqiptar, pa asnjë detyrim të tregtarëve për t’i hequr dhe pa asnjë njoftim publik që janë të rrezikshme.
AKU e lejon aktivitetin e kësaj firme, paçka se prej 10 ditësh ka marrë vetë vendim, që bllokimi i fabrikës, magazinave e futjes së produkteve të saj në treg, do jetë në fuqi deri sa të përfundojë hetimi nga Instituti i Sigurisë Ushqimore-Veterinare, i cili i ka çuar mostrat për analiza në Itali e kthehen pas 3 muajsh.
Asnjë veprim hetimi, shoqërimi apo ndalimi, nuk po bëhet as nga sektori i anti-krimit ekonomik, ndaj 3 mashtruesve të kësaj firme, Piro Karanxha, Nikolla Gjoni e greku Antonios Ouzas, kur veprimin ndaj krimit të tyre e detyrojnë nenet 288 e 288/C të Kodit Penal.
Sipas policisë, kjo e di që në fabrikën “Gjirofarma” ka krim ushqimor, por nuk vepron as ta bllokojë, pasi shefat e Autoritetit Kombëtar të Ushqimit në Qendër e Gjirokastër, nuk kanë depozituar denoncim për këtë krim.
Në fakt, nuk e pengon mungesa e denoncimit nga AKU, por lidhjet që pronarët e kësaj firme, kanë jo vetëm me policinë, të cilës i kanë dhuruar pako me ushqime; por dhe me kryeministrin Rama e deputetët zonalë Bledar Çuçi dhe Mirela Kumbaro, të cilët i kanë mbështetur në fushata me vota, ndihma ushqimore e sponsorizime./Pamfleti