Ish-kryeparlamentarja Jozefina Topalli ka refuzuar sërish të bëhet pjesë e takimeve të ish-kryeministrit Sali Berisha në Shkodër, kur ai mbajti “foltoren”, Topalli nuk shkoi. Në atë kohë u distancua dhe kryebashkiakja Voltana Ademi.
Dje u mbajt një aktivitet në Shkodër me rastin e 31-vjetorit të themelimit të PD, ku Berisha ishte organizuesi. Mirëpo edhe pse i ka dalë në mbështetje, Topalli nuk ishte në takim. Ndërkohë dje, me anë të një postimi në rrjetet sociale, Topalli ka sulmuar kreun demokrat Lulzim Basha. Topalli u shpreh se Basha për tu mbrojtur nga demokratët që dikur e kanë mbështetur, kërkoi ndihmën e kryeministrit Edi Rama dhe Policisë.
Sipas kryeparlamentares, Shkodra kërkon që Basha të largohet, duke iu referuar kështu takimit të ish-kryeministrit dhe thirrjeve për të larguar Bashën nga PD. “Monument, që ruhet nga shteti! Sot ishte ditë me diell, por Lulzim Basha doli me çadër, për t’u mbrojtur nga vezët që mund t’i hidhnin njerëzit e tij. Pas kërkesës së Lulzimit, edhe sot, Edi Rama urdhëroi policë nga Fieri dhe nga Vlora për të ruajtur Lulzim Bashën nga njerëzit e tij.
Kjo që ndodh tek ne është unike në botë. Ka dështuar çdo kauzë; ka djegur mandate; ka bojkotuar zgjedhje; ka përjashtuar me vendim personal liderin historik të PD; ka bërë marrëveshje financiare me kundërshtarin; është shkarkuar nga anëtarësia me 4500 delegatë dhe 45 mijë anëtarë e thotë unë po sakrifikoj për ju! Ky është monument i turpit, që ruhet nga shteti! Ndërkohë në Shkodër i gjithë pallati i Sportit thërret: Basha ik”, tha Topalli.
Nga ana tjetër edhe deputeti Flamur Noka, u shpreh se demokratët refuzojnë të jenë pjesë e një bunkeri prandaj askush nuk mund të mbajë peng shtëpinë e tyre. Sipas tij, demokratët nuk janë përçarë nga shoqata e drynave dhe llozeve. “Të jeni të sigurt se demokratët janë aty ku duhet të jenë.
Ata refuzojnë të jenë pjesë e një bunkeri. Çështje të tilla do zgjidhen shumë shpejt, askush nuk mund të mbajë peng shtëpinë e demokratëve me hekura dhe gaz lotsjellës. Mund të mbyllë pengun nëse do në shtëpinë e tij, por jo demokratët. Është shoqata e bravave, shulave dhe llozeve dhe më pas janë demokratët të cilët nuk janë të përçarë”, tha Noka.