Skenarët destabilizues të ish-kryeministrit Sali Berisha kanë tërhequr vëmendjen e medieve ruse. Në mbledhjen e Kryesisë së PD, pak ditë më parë u fol se janë influencat ruse ato që po shtyjnë Berishën në dhunë e kaos, por teksa nuk ka fakte për një gjë të tillë, bie në sy se mediat ruse janë të vëmendshme ndaj të tilla ngjarjeve.
Përveç shumë portaleve që kanë shkruar për 8 janarin, një prej gazetave më të njohur që ka shkruar është gazeta “Pravda”. Ata që kanë jetuar gjatë sistemit komunist e njohin shumë mirë këtë gazetë, pasi ajo ka qenë organ zyrtar i Partisë Komuniste të Bashkimit Sovjetik.
Ajo nisi prodhimin që në vitin 1912 dhe ka qenë gazeta me tirazhin më të madh gjatë udhëheqjes komuniste. Por si për ironi, kjo gazeta i ka kushtuar një shkrim protestave në Europë e Ballkan, ku ka përmendur edhe protestën e 8 janarit të zhvilluar në PD.
“Një ndarje e Partisë Demokratike, forca kryesore opozitare në vend, çoi në protesta masive dhe përpjekje për të marrë selinë e saj. Ish-kryetari Sali Berisha dhe mbështetësit e tij po përpiqen të largojnë nga kreu i partisë Lulzim Bashën, i emërtuar si “peng” i kryeministrit Rama. Basha largoi nga grupi parlamentar Berishën në muajin shtator pas akuzave të SHBA, e cila e shpalli të padëshiruar me argumentin se kur ishte kryeministër në periudhën 2005-2013, ishte i përfshirë në korrupsion dhe përdori pushtetin për të pasuruar veten, familjen dhe aleatët e tij”, thuhet në artikull.
Ndërkohë shumë portale të tjera që prej muajit shtator e deri më sot u kanë bërë jehonë qëndrimeve të Berishës kundër SHBA. Por interesant është fakti se atij i jepet mbështetje nga një gazetë komuniste. Nuk duhet harruar fakti se pak kohë më parë dolën foto të ish-kryeministrit në krah të Enver Hoxhës.
Zërat për ndikimin rus
Skenarët destabilizues të ish-kryeministrit Sali Berisha kanë ngjallur shumë dyshime në arenën politike shqiptare. Prej kohësh është folur se ai mund të ketë lidhje me influencat ruse, por i vetmi që ka bërë një akuzë të drejtpërdrejtë ka qenë deputeti Kreshnik Çollaku. Në mbledhjen e Kryesisë të mbajtur pak ditë më parë ai ka deklaruar prerë se pas këtyre skenarëve destabilizues fshihen agjenturat ruse.
“Këto janë inteligjencat ruse me kishën ortodokse. Influencat e kundërshtarëve të Amerikës. Ata që i sollën te dyert e godinës ishin miqtë tanë të një jete, si mund ta lejonin ata këtë dhe aq më tepër si mund ta lejojnë sot pa u distancuar prej saj. Atë ditë, Zoti e bëri që në godinë të mos kishte viktima.
Dhuna për mua është një kufi ndarës me këdo. Ndaj, unë mendoj me këdo që nxiti apo përdori dhunë ndaj nesh, kolegeve e ish-miqve të tyre, nuk ka çfarë na mban më bashkë. Në këtë parti dhunuesit dhe të dhunuarit nuk mund të rrinë më bashkë”, ka thënë Çollaku. Nga ana tjetër kemi amerikanët që kanë rritur prezencën në Ballkan për shkak të influencave ruse dhe kineze. SHBA do të sjellë në Tiranë një shtab të forcave speciale që do të përdoren për trajnime dhe misione specifike. Qëllimi duket se është pikërisht ndikimi rus. Nga ana tjetër shumë raporte flasin se Moska po tenton destabilizim në Ballkan.
