Sali Berisha ka nisur presionet ndaj gjyqtarëve që kanë në dorë certifikimin e Statutit të Partisë Demokratike që mbështet nga ai dhe besnikët e tij.
Më 15 dhjetor të këtij muaji Komisioni i Rithemelimit të PD i depozitoi në Gjykatë ndryshimet statutore që u miratuar në Kuvendin Kombëtar të Partisë Demokratike më 11 dhjetor, të thirrur nga ish-kryeministri Sali Berisha, me qëllim për të legalizuar çdo ndryshim të miratuar në Kuvend. Këto ndryshime tashmë ndodhen në tryezën e gjyqtarit Agron Zhukri.
Por teksa ky i fundit nuk është shprehur ende për këtë çështje, zoti Berisha i ka bërë thirrje gjyqtarit Zhukri që të jetë objektiv në punën e tij dhe se sipas ish-liderit demokrat, nuk ka arsye që të mos miratohet nga gjykata ky statut. Gjatë një prononcimi për mediat, Berisha theksoi dje dokumenti i statusit është hartuar konform ligjeve në fuqi, ndërsa i kërkoi gjyqtarit që ta certifikojë atë, pasi sipas tij, aty është vullneti i shumicës së demokratëve, duke i bërë kështu presion indirekt.
“Ky statut do të shkojë në gjykatë për t’u verifikuar nëse përputhet me nenet e Kushtetutës së Shqipërisë. Asgjë tjetër, ky proces nuk ka lidhje me gjykatën. Pluralizmin nuk e përcaktojnë gjykatat. Nëse gjyqtari kërkon të verifikojë , nuk mund ë mos barazohet me cilindo që kërkon të bëjë transparence, por si qytetar jo si gjyqtar. Aty kemi të bëjmë me shumicë të pakrahasueshme”, deklaroi ai.
Berisha konfirmon se protesta e 8 janarit është kundër Bashës
Më tej gjatë fjalës së tij ish-kryeministri Sali Berisha ka konfirmuar edhe atë që gazeta “SOT” deklaroi pak ditë më parë se protesta e 8 janarit e thirru prej tij është do të jetë kundër Lulzim Bashës dhe jo kundër qeverisë e madje skandalit të patronazhistëve, sikundër pretendon ish-lideri demokrat.
Prerë dhe qartë, zoti Berisha theksoi dje në intervistën për “A2CNN”, se nëse Basha nuk largohet nga zyra e kryetarit të Partisë Demokratike brenda 5 janarit, atëherë anëtarësia e partisë do ta nxjerrë nga zyra. “Nëse Basha nuk largohet nga zyra brenda 5 janarit, do të ketë një protestë paqësore.
Ai po mban selinë, kështu që paqësisht, përmbaruesi anëtarësi do ta nxjerrë nga zyra. Anëtarësia do i tregojë se ajo zyrë nuk është e një deputeti, por e atij që do të zgjedhin anëtarët e PD-së për drejtimin e saj.
Deputeti Basha do të largohet nga zyra dhe kaq është historia. Ne do të bëjmë protestë absolutisht paqësore. Natyrisht, siç e panë mediat, ai kishte futur banditë të armatosur në seli, në datën 18. Ky ishte një akt shumë i rëndë, nga më të pashembulltit në historinë e një force politike demokratike.
Mediat i kanë faktuar këto me emra dhe fotografi. Uroj që të ketë nxjerr mësim nga akti i tij i turpshëm dhe t’i nënshtrohet verdiktit të 44 000 anëtarëve të PD-së. Përndryshe, ata butësisht do ta nxjerrin nga zyra”, u shpreh ai. Ndërkohë ish-kryeministri Berisha ka ironizuar kryedemokratin Lulzim Basha, duke i përmendur edhe nofkën që i ka vendosur vetë “Lul Brava”.
“Nuk ka pasur dy Kuvende. Basha u përpoq të bënte anti-Kuvend, ai vazhdoi me heqje bravash, e paska patur një ves të keq që kur ka qenë kryetar Bashkie. Paska qenë maniak bravash. Maniak për t’i ndërruar”, nënvizoi Berisha.