Kryetarja e Lëvizjes Socialiste për Integrim, Monika Kryemadhi i ka vënë “vulën” përfundimit të bashkëpunimit me Partinë Demokratike.
Në një intervistë për “A2CNN”, Kryemadhi u shpreh se edhe PD dhe PS kërkuan që të eliminonin LSI nga skena politike, duke shtuar se të dyja palët i kishin bërë llogaritë gabim, duke përmendur numrin e votave të marra në zgjedhjet parlamentare të 25 prillit.
Po ashtu, në fjalën e saj, ajo u shpreh se në të ardhmen LSI do të luante një rol kryesor për të ruajtur balancën politike në vend, por nuk dha detaje të tjera.
“Unë dua të theksoj se dëmin ne ia bëmë opozitës, qoftë unë, qoftë Berisha, qoftë Basha. Metodoligjia për të mos bërë fushatë në zgjedhjet e 25 prillit, për të krijuar kultin e individit, mendoj se ishte gabim i opozitës.
Pretendonim të bënim Bashëm kryeministër, por duhet të dilnim me disa kandidatë për të mos ia bërë asnjërit të qartë se kush do të ishte kryeministër, i cili do të merrte atributet e ndarjes së tortës le të themi me Ramën.
Ndërkohë që mendoj një situatë e tillë brenda PD është e nevojshme. Ka shumë për të kuptuar sepse u bënë disa fushata që humbet. Edhe LSI. Por ne hymë në zgjedhje pa asnjë armë politike për t’i qëndruar besnike fronti opozitar, që sot nuk ekziston më.
Ai front shërbeu për të majmur llogari bankare e xhepat e disa individëve. Qëllimi ishte goditja e LSI, për ta nxjerrë jashtë loje. Por i kanë bërë gabim llogaritë. Votat e LSI do të vendosin balancat për të ardhmen, qoftë në zgjedhje lokale…qoftë në… I kanë bërë të dyja palët llogaritë gabim,”-u shpreh ajo.