Nga Anri Bala
Nikolla, me gazetën e tij “Koha Integrim”, herë si Les e herë si Spiten, “ja pa hajrin” Monikës dhe Presidentit të këmborave, me shitjen de fakto që i ka bërë “Kohës” së tij! Pasi qau e na u qurravit, se Sali Berisha ja kishte djegur gazetën, sot, ai bashkë me gjithë eunukët e tij, i’a vuri flakën vetë…!
Pas zjarrit të Berishës, nuk mbeti asgjë nga Koha e as nga Nikolla i vjetër, të cilët çdo ditë që kalon, tregojnë haptazi, se nuk kanë më asnjë lidhje me gazetën dhe as me gazetarin, por me shërbesa të përvuajtura ndaj politikanëve të zhytur deri në grykë me krime, që nganjëherë, kur i vë në peshore edhe me Berishën, ky i fundit për dreq të duket më i “mirë”!
Ashtu si anal-isti tjetër Zheji, gudulisjet që i bënë “trimit” Lulzim Basha, se qenka frikacak dhe si ndërmjetësues i krushqisë mes Monikës dhe PD-së, Nikolla ka dal “pazarit” dhe po kërkon veprime të fuqishme opozitare, si ajo e “200 Kuksianëve” dhe zgjidhjen e çështjes Tahiri, që as njëra dhe as tjetra, nuk kanë lidhje me opozitarizmin.
Kuksianët nuk protestuan për ty o Koll dhe as për Lulin, që të kapnit ju “flamurin e piratit”, për të nisur sulmin me mullinjtë e erës, por për familjet e tyre të varfëra. Tahiri, o Koll Integrimi, po hetohet dhe nëse ka faj, do dënohet! Po si do ja bëjmë me këtë trimin tënd që na qenka trembur, edhe pse trimëria e tij më e madhe ishte ngritja e një lokali birrëtore-shurrëtore, që e quajti “Kioska e Republikës së Re”?!
Po kaq miop i di njerëzit ti Koll?! Partia Demokratike, sikur të mos kishte pranuar futjen në zgjedhje, duke mos përfituar pushtet të pamerituar në tavolinë, nuk do të ekzistonte as si “OJQ”! Pushteti i tavolinës, me Ballanca e kompani, i ka efektet edhe sot, i shoqëruar me tendera të dhuruar nga ministrat e çadrës. Nikollë hap sytë, se po u shëmb Kulla e Lalëzit, do shëmbeni “të gjithë ju derdimenë e derbederë, që hyni e dilni derë më derë dhe dilni gjithmonë të përmjerr”, do të thoshte Sefer Daja.
Tufat tuaja, nuk bëjnë popullin, se populli është fjalë e madhe, ndaj nëse populli që do drejtësi dhe kthimin e pasurisë së grabitur nga hajdutë dhe kriminelë të të gjitha ngjyrave, të parët që i pret zemërimi i gjykatësit të pagabueshëm, do jenë bejlerët tuaj, që u shërbeni si argat, pastaj janë vrasësit dhe hajdutët e shumtë të pushtetit tënd, që pret të rikthehet me aksione opozitare, pastaj puthadorët për një kockë e karrige dhe në fund edhe populistët, që kanë bërë kërdinë në emër të xhepit… të popullit!
Mos bëj si Saliu, me “pakënaqësitë që janë rritur”! Në fakt ti ke të drejtë, sepse nuk shikon antimitingjet të tipit Berisha, që nëse do i kishe parë, do ishe ti i pari dhe të gjithë ato që vazhdojnë e hedhin gurë e llumë mbi Shqipërinë, duke i vendosur tela me gjemba rrugës Europiane, që do strukeshit, e nuk do gjenit vrimë ku të futeshit.
Nëse ti dhe lakenjtë tuaj i kanë harruar tmerret Berishiane, kur edhe macet e qentë flinin poshtë divanit, se mund t’i kapte plumbi “qorr” i bandave të 1996-’97- ’98, e tjera pafund, populli jo, nuk i ka harruar! Memoria e popullit nuk shuhet, se e trashgojnë brezat, kurse e lehësave po, sepse si gjithë kafshët, nuk kanë breza.
Nikollë, kur ke ulur flamurin tënd nga joshjet dhe miklimet e parave, si do të ngreshë flamurin e opozitarizmit të Lulit, që është aty, për ato që po mundohesh dhe ti… për plaçkë!
Vërtet na habisni, se si vendi i rapsodëve dhe i lahutës, ka nxjerrë kaq shumë gazet(qyq)arë, që flasin me njerëzit, falë parave që kanë fituar në kohën e “artë”, kur nuk ua djeg askush të shenjtën kolibe të lehjes… redaksinë! Bëji të fala Vasalit ose Monarkës që të ushqejnë!