Ish-presidenti Bujar Nishani ka shpërthyer dje në akuza të forta në adresë të kreut të Partisë Demokratike, Lulzim Basha, ndërsa ka treguar arsyet se përse mbështet “Foltoren” e ish-kryeministrit Sali Berisha.
Përmes një statusi në rrjetet sociale, ish-presidenti Nishani theksoi se PD ndodhet në krizë për shkak të lidershipit, ndërsa shtoi se “Foltorja” e Berishës, sipas tij, është garancia për rikthimin e demokracisë në Partinë Demokratike.
“Të premten do t’ju bashkohem demokratëve të Beratit dhe të trevave të atij qarku, në Foltoren e z. Berisha. Shpresa për shpëtimin dhe ringritjen e Partisë Demokratike po rritet me shpejtësi, nga dita në ditë. Berati me “aristokracinë e tij qytetare” prej shekujsh ka rrezatuar shkëlqimin e civilizimit shqiptar.
Tashmë Berati dhe demokratët e atij qarku kanë misionin historik t’i japin energjinë e merituar shpëtimit, bashkimit, ringritjes dhe forcimit të Partisë Demokratike si shpresa e vetme e patriotizmit, lirisë dhe të drejtës për shqiptarët. Të shpëtojmë PD për të shpëtuar Shqipërinë”, shkruan Nishani. Nga ana tjetër ish-deputeti i PD, Aldo Bumçi ka komentuar dje mbledhjen e firmave nga “foltoret” e Sali Berishës për thirrjen e Kuvendit Kombëtar të PD. Gjatë një prononcimi për mediat, Bumçi e vlerësoi maksimalisht si një lajm shumë të mirë, pasi sipas tij, Berisha me besimin që u ka dhënë demokratëve dhe qytetarëve të këtij vendi, ktheu pakënaqësinë në shpresë.
“Është një lajm shumë i mirë. Po ta mendosh se kur u nis si lëvizje cila ishte gjendja në PD pas humbjes së zgjedhjeve, e cila përfshiu një dëshpërim jo vetëm ne po edhe demokratët që na votuan, pjesë të shoqërisë që prisnin me padurim ndryshimin që ne nuk arritëm ta sillnim. Por Berisha me besimin që u ka dhënë demokratëve dhe qytetarëve të këtij vendi, pasi ndryshe Facebook-u i tij nuk do kthehej institucioni më i besueshëm në këtë vend, arriti të ngjiste shumë shpejt dhe e ktheu pakënaqësinë në shpresë dhe kemi një ndryshim atmosferë në PD si në vitin 2005. Njerëzit duan shpresë dhe atë e gjetën në këto takime”, deklaroi Bumçi.