Në ndeshjen e djeshme në Vlorë midis Flamurtarit e Vllaznisë, mbyllur në barazim 1-1, pati një tension të madh gjatë dhe pas lojës. Deklaratat janë të ndryshme, por referuar presidentit Sinan Idrizi, gjyqtarët dhe funksionarët e FSHF-së e kanë tepruar me fyerjet e tyre.
Sjellja dhe veprimet e gjyqtarëve nuk janë përtypur nga tifozët, të cilët edhe kanë goditur arbitrin anësor, por për administratorin e Flamurtarit Sinan Idrizi është fat i madhq ë dje në stadiumin e Vlorës nuk pati viktima në njerëz, sepse, sipas tij, gjyqtarët provokuan rëndë dhe zyrtarët e FSHJF-së fyen rëndë tifozët vlonjatë. Dje, libri i shtëpisë zbriti nga shkallët e stadiumit në dhomat e zhveshjes dhe “motra…”, aq e dashur në Vlorë, infektoi edhe zyrtarët e FSHF-së dhe gjyqtarët e takimit. Në një mjedis kaotik dhe të frikshëm, ku rrezikohej jeta e zyrtarëve të ndeshjes, Sinan Idrizi ka versionin e tij për ngjarjen.
Sot, shumë më i qetë se dje, numri një i klubit vlonjat , referuar “Vipsport.al”, tregon çfarë ndodhi konkretisht në stadiumin e Vlorës, çfarë fjalori përdorën dy arbitrat gangsterë, prapaskenën me Ilir Tartarin dhe komunikimin me drejtorin e policisë:
“Ishte e paimagjinueshme ajo që ndodhi dje në stadiumin e Vlorës dhe mund të them se një Zot e di, si nuk pati pasoja më të rënda, si nuk pati viktima, sepse e tillë u krijua situata. Unë paskam nxitur dhunën? Mund të thotë çfarë të doja ai zotëria, por unë jam munduar vetëm ta qetësoj situatën, sepse kisha frikë se mos ndodhte më e keqja.
Që me daljen e Beharit me karton të kuq, u mundova ta qetësoj. Pastaj, pas ndeshjes zbrita poshtë dhe sërish vetëm për të qetësuar situatën dhe për të shmangur problemet. Ishte vetë drejtori i policisë, i cili më tha: ‘Në gjithë jetën time kështu nuk më kanë zënë ndonjëherë sytë si këta’. E kishte fjalën për sharjet dhe ofendimet e arbitrave Sino dhe Tartari.
E dini çfarë thoshin? Shanin me libër shtëpie drejtuesit tanë dhe tifozët: “U bëjmë motrën gjithë vlonjatëve!’ – thoshin. Pastaj m’u drejtua edhe mua me të njëjtën sharje. E kuptoni në çfarë pikë jemi. Nuk kemi të bëjmë me njerëz, që të ulemi të flasim dhe të diskutojmë. Flamurtarit i janë dhënë 17 penallti kundër dhe unë sërish jam munduar të ruaj qetësinë, por kështu nuk mund të vazhdohet.
E dini diçka tjetër? Këtë zotërinë, Ilir Tartarin, vijnë e kërkojnë borxhlinjtë e kumarit gjithmonë para ndeshjes në Vlorë. Jam munduar që këta njerëz të qëndrojnë sa më larg, sepse nuk dua të kemi probleme në stadium. Paska një histori të vjetër, që në dhjetor. I tillë person është dhe me të tillë persona kemi të bëjmë. Këta janë punonjësit e FSHF-së. Imagjinoni! Për çfarë futbolli mund të flasim?”, – është shprehur administratori Sinan Idrizi. Natyrisht, ngjarjet e djeshme në Vlorë do të jenë objekt penalizimi nga Komisioni i Disiplinës dhe Flamurtari mund të dënohet rëndë për sjelljen e tifozëve të tij, që e kanë rast të përsëritur.