Prova që vendosi vulën e përjashtimit nga sistemi i drejtësisë të prokurorit Besim Hajdarmataj ishte ajo e paraqitur ditën e fundit, para vendimit në Kolegjin e Posaçëm të Apelimit.
Kjo provë e ka gozhduar ish kreun e krimeve të rënda duke mbetur pa fjalë kur në kolegj doli fakti se prokurori përdorte një numër telefoni të fshehtë për të komunikuar, numër i cili ishte i regjistruar në emër të një tjetër personi, por që në tabulatet e tij u gjetën bisedat e Hajdarmataj me njerëzit e botës krimit në Laç dhe Shkodër të cilëve ai u kishte mbyllur dosjet e bixhozit, të dhunës, kanosjes dhe pengmarrjes.
Ky numër në regjistër mbante emrin e një gruaje nga Fieri, nga ku doli se mbrëmjen e 27 korrikut 2017, në orën 22:03 Prokurori Besim Hajdarmataj i kishte nisur dy mesazhe një personi të botës së krimit në Shqipëri. Kjo provë suprizë erdhi në KPA nga Komisioneri Publik, por për ta siguruar atë, deri momentin e fundit mësohet se u bë e mundur nga prokurorët dhe gjyqtarët e Shteteve të Bashkuara të Amerikës dhe Bashkimit Evropian, të cilët janë pjesë e Operacionit Ndërkombëtar për monitorimin dhe Vetingut.
Kur Besim Hajdarmataj u gjend përballë kësaj prove i kapur në befasi, nisi të mohonte se numri i telefonit ishte i tij, madje tha se gjatë gjithë jetës së tij kishte qenë në Fier vetëm 30 minuta. Por këtë herë ish kreu i krimeve të rënda ishte nën kurthin e provave të siguruara nga SHBA. Përfaqësuesit e ONM kishin hulumtuar nëpër dokumente derisa zbuluan këtë numër të fshehtë si provën më të fortë, dhe kishin zbuluar se ky numër i fshehtë telefoni, ishte deklaruar nga Besim Hajdarmataj si numri i tij në deklaratat e pasurisë që kishte dorëzuar në ILDKP disa vite më parë. Në këtë moment Besim Hajdarmataj ngeli pa asnjë alibi dhe kërkoi kohë që të verifikonte nëse e kishte deklaruar vërtetë një numër të tillë vite më parë dhe që mund të ishte bërë një lapsus.
Por pa humbur kohë, vetë trupa gjykuese ia kurseu mundin dhe i serviri prokurorit deklaratat e pasurisë që ai vetë kishte bërë, ku numri i telefonit që kishte fshehur ishte i rrethuar në deklarata e viteve më parë dhe prej të cilit dolën mesazhet e komunikimin me njerëzit e krimit të dosjeve të mbyllura prej tij. I vënë me shpatulla pas murit, prokurori artikuloi edhe alibinë e fundit, se po është i njëjti numër, por ai ishte me 067 dhe jo 069, por provat e dosjes së udhëhequr nga Theo Jecobs kishin vulosur tashmë shkarkimin e tij për thyerjen e besimit të publikut në sistemin e drejtësisë.
Dalja nga sistemi i drejtësisë është fundi i karrierës së prokurorit Hajdarmataj. KPA vendosi djepranimin e kërkesës së ndërkombëtarëve dhe Komisionerit Publik duke zhbërë kështu vendimin e Komisionit të Pavarur të Kualifikimit. Pasivitet në hetimin e çështjeve sensitive si ato të drogës, sjellje gjyqësore jo të dënje, pasuri jo të justifikuar, mangësi profesionale, cenim i besimit te publikut te sistemi i drejtësisë, ishin disa nga argumentimet nga trupi gjykues. Sa i përket pasurisë pasurisë Kolegji vendosi se ka mungesë burime financiare të ligjshme. Kolegji konstatoi se shumica monetare si një pasuri gjendje cash kalon limitimin 1.5 milionë për tu mbajtur si e tillë./ Shqiptarja.com