Një ngjarje e rëndë ka ndodhur mëngjesin e kësaj të diele në Kroaci, ku një autobus me targa të Kosovës ka dalë nga rruga dhe është përmbysur, ndërsa 10 persona kanë humbur jetën dhe 45 persona kanë mbetur të plagosur.
Paraprakisht dyshohet se shkak ka qenë përgjumja e shoferit. Sipas mediave kroate, autobusi bënte linjën Frankfurt-Prishtinë dhe në momentin e aksidentit, ishin 60 persona brenda.
Si fillim policia kroate raportoi për tre të vdekur, ndërsa aktualisht numri i viktimave është 10, identiteti dhe mosha e të cilëve nuk është bërë e ditur.
Përveç policisë, në vendin e ngjarjes janë parë edhe pjestarët e ekipit të zjarrëfikësve, ambulanca dhe 30 persona janë dërguar në spital. Njëri nga udhëheqësit e policisë në vendin e ngjarjes ka rrëfyer për rastin.
“Unë kam qenë në shumë aksidente, por ky është me të vërtetë i rëndë dhe mendoj se është ndër aksidentet më të rënda që kam parë. Autobusi ishte plot, por nuk mund të them nëse kishte fëmijë mes të vdekurve ose të plagosurve. Sipas udhëtarëve, kishte mbi 60 persona në autobus”, tha Galic.
“Situata është shumë e vështirë dhe ka ende numër të madh të pasagjerëve që iu kërcënohet jeta brenda në autobus”, tha një zëdhënës i policisë.
Ndërsa një tjetër zyrtarë Drejtori i Mbrojtjes Civile në Kroaci, Damir Trut dha këtë informacion, duke treguar paraprakisht për detajet e aksidentit dhe gjendjen e atyre që po trajtohen në spitalin rajonal në Slavonski Brod.
“14 pasagjerë dhe një shofer janë në stacionin e Policisë, në pritje për t’u akomoduar në një strukturë të siguruar nga qarku”, tha Trut.
Ai tha se autobusi kishte 67 pasagjerë dhe dy shoferë, njëri prej të cilëve vdiq së bashku me 9 udhëtarë.
“Shkaqet e aksidentit mund të merren me mend tani për tani, por asgjë definitive nuk mund të thuhet”, thonë autoritetet kroate.