Pandemia në vend duket se është drejt zhdukjes, por masat kufizuese vijojnë që të jenë ende në fuqi. Prej disa muajsh, vendi u përballë me shifra të lartë infektimesh dhe humbje jete nga Covid, ndërsa kohët e fundit po shihet një ulje drastike e shifrave.
Gjatë javëve të fundit, numri i rasteve ditore pozitive me Covid ka qenë shumë i ulët, po ashtu edhe numri i vdekjeve. Dje pati 2 infektime në rang vendi. Nga ana tjetër komiteti Teknik i Ekspertëve, i mbledhur pak javë më parë, bëri me dije se me përmirësimin e situatës nga Covid dhe nëse numri i rasteve do të ulej ndjeshëm, do të kishte edhe lehtësim të mëtejshëm të masave kufizuese.
Por, edhe pse numri i infektimeve dhe rasteve të jetëve të humbura nga Covid ka një rënie drastike, orari kufizues vijon të mbetet në fuqi. Mesa duket, fasha orare e cila qëndron ende në fuqi, është një alibi për të gjobitur qytetarët dhe bizneset, pasi polica pas orës 23.00 të mbrëmjes ngre postblloqe dhe gjobit qytetarët të cilët, nuk respektojnë masat anti-Covid.
Por, pavarësisht fashës orare, shumica e bareve dhe restoranteve në vend nuk respektojnë orarin. Rasti më i fundit ishte ai i ndodhur ditën e djeshme, ku pronari i një lokali në Sarandë u qëllua me armë rreth orës 3 të mëngjesit, gjë e cila tregon se masat nuk respektohen.
Unioni Turistik kërkesë ministrisë
Ndërkohë, Unioni Turistik i ka dërguar dje një kërkesë Ministrisë së Shëndetësisë për të parë mundësinë e zgjerimit të mëtejshëm të masave anti-Covid. Sipas tyre, masat anti-Covid, duke përmendur orën policore dhe moslejimin e muzikës pas orës 22:00, po pengon mbarëvajtjen e sezonit turistik.
Unioni kërkon rishikim të rregullave, në mënyrë që, sipas tyre, të ndihmohen bizneset dhe t’u krijohet mundësia për argëtim turistëve që kanë zgjedhur vendin tone për pushime. “Jemi të mendimit se ne kushtet aktuale duhet rishikuar mundësia për zgjerimin e masave në mënyrë që të ndihmohen bizneset dhe njëkohësisht t’u krijohen kushtet për argëtim turistëve që kanë zgjedhur
Shqipërinë për të kaluar pushimet e tyre,pasi kjo do shtonte kërkesën dhe do bënte të mundur rritjen e numrit te turisteve që do vijnë në Shqipëri, gjë e cila do kontribuonte në rritjen e të ardhurave për ekonominë tonë. Siç jeni në dijeni, shumë vende Evropiane, me qëllim që të mos shkaktojnë barriera gjatë sezonit turistik, kanë hequr orën policore, lejojnë organizimin e eventeve në ambiente të hapura deri në maksimum 100 persona dhe lejojnë muzikën gjatë organizimit të eventeve”, thuhet në kërkesë.
Ndër të tjera, Unioni Turistik shprehet se kanë marrë shumë ankesa nga turistët për shkak të moslejimit të muzikës pas orës 22:00. Po ashtu, më kërkesën e Unionit sugjerohet që fasha orare të zgjatet deri në orën 24:00 që të gjithë të kenë mundësi që të dalin në mbrëmje. /SHKRUAR NGA SIDORELA BRAÇJA