Zbardhen të dhënat statistikore sa i takon procesit të vetingut nga shtatori i vitit 2017 deri në prill të 2018. Komiteti Shqiptar i Helsinkit ka kryer një monitorim për punën e kryer deri tani gjatë kësaj periudhe, ndërsa nuk mungojnë as kritikat për një proces të ngadaltë. Mirëpo ajo që bie më së shumti në sy përgjatë gjithë raportit të KSHH është refuzimi i disa gjyqtarëve dhe prokurorëve për të deklaruar të dhënat e tyre të plota në formularët e vetëdeklarimit.
Më konkretisht, në dokumentin e siguruar nga gazeta, Komiteti Shqiptar i Helsinkit, ka konstatuar se 25 emra të fushës së drejtësisë nuk iu janë përgjigjur pyetjeve, kryesisht për lidhjet e tyre me botën e krimit. Duke qenë se formulari i tyre i vetëdeklarimit nuk është i plotë dhe i saktë, pritet që këta gjyqtarë dhe prokurorë të përballen me shkarkimin nga detyra kur të përballen me trupën gjykuese të Komisionit të Pavarur të Kualifikimit.
“Sipas DSIK, 3% e gjyqtarëve/prokurorëve nga 801 në total nuk i janë përgjigjur me saktësi pyetjeve në formularët e vetë deklarimit ose kanë pasur mangësi në plotësimin e të dhënave dhe dokumentacionit të kërkuar. Ndërkohë, ILDKPKI referon se 3 gjyqtarë të gjykatave të rretheve gjyqësore, 1 gjyqtar i Gjykatës së Lartë dhe 2 anëtarë të Gjykatës Kushtetuese nuk e kanë dorëzuar deklaratën e pasurisë”, thuhet në raportin e KSHH.
Po ashtu, aty vihet në dukje se ka një mospërputhje midis Inspektoratit të Lartë Deklarimit dhe Kontrollit të Pasurisë dhe Drejtorisë së Sigurimit të Informacionit të Klasifikuar sa i takon numrit të dorëzimeve të deklaratave të pasurisë. “Numri 794 i subjekteve të rivlerësimit që kanë dorëzuar deklaratën e pasurisë pranë ILDKPKI-së nuk përputhet me numrin 801 të subjekteve që kanë dorëzuar deklaratën për kontrollin e figurës pranë DSIK-së. Shkak i mospërputhjes mund të jetë edhe dorëheqja e disa subjekteve të vetingut gjatë procesit të dorëzimit të formularëve të vetë deklarimit pranë këtyre organeve”, vijon më tej raporti i monitorimit.
KLD asnjë kontroll për karrierën
Një tjetër pikë mjaft interesante që del në pah gjatë vëzhgimit të kryer nga KSHH për ecurinë e procesit të vetingut deri tani është edhe kritika e rezervuar për Këshillin e Lartë të Drejtësisë. Sipas raportit, në ndryshim nga ILDKP dhe DSIK, KLD nuk kryen asnjë vlerësim paraprak për deklarimet dhe dosjet e subjekteve të rivlerësimit.
Pra, KLD nuk del në asnjë konkluzion dhe nuk kryen kontroll për personat që i janë nënshtruar vetingut, nëse ka shkelje apo jo, por thjesht i dorëzon dosjet e tyre tek KPK dhe ia lë në dorë trupës gjykuese për vendimin përfundimtar. “Mënyra se si kanë operuar organet ndihmëse në raport me Institucionet e Pavarura Kushtetuese të vetingut nuk rezulton të jetë e unifikuar. Pjesërisht kjo mund të vijë edhe për shkak të ligjit.
DSIK dhe ILDKPKI pranojnë se disponojnë në raportet e tyre konkluzione ose vlerësime paraprake lidhur me dy komponentët për të cilat ato ndihmojnë (figura dhe pasuria). Ndërkohë, KLD dhe Prokuroria e Përgjithshme referojnë drejtpërsëdrejti ose tërthorazi se nuk disponojnë konkluzione lidhur me aftësitë profesionale përkatësisht të gjyqtarëve dhe prokurorëve, në raportet e hollësishme dhe të arsyetuara që u vendosin në dispozicion komisioneve të vettingut.
Në përgjigjen e Inspektoratit të KLD-së mungonte informacioni sesa prej subjekteve në kompetencë të tij ishin ose jo të aftë profesionalisht”, thuhet në raportin e Komitetit Shqiptar të Helsinkit./SOT