Sherri në Sauk të Vjetër pranë zyrave të LSI-së pak përpara mesnatës me pasojë 3 të plagosur, vëllezër me njëri-tjetrin, ka nisur për një vajzë.
Mësohet se Roland, Eltjan dhe Klodian Doka ky i fundit kandidat për deputet në radhët e LSI, janë konfliktuar me disa persona në orët e drekës të së shtunës.
Ngjarja e drekës është zhvendosur në darkë në një lokal pranë xhamisë në zonën e Saukut të Vjetër në Tiranë, ku ndodhen edhe zyrat e njërës prej degëve të LSI. Njëri nga autorët që ka plagosur vëllezërit, i ka thënë njërit prej këtyre të fundit, se e ka sharë dhe i ka folur keq një vajze me të cilën kishin njohje të përbashkët.
Gjithashtu, lidhur me ngjarjen ka reaguar dhe Policia e Tiranës.
Njoftimi i plotë:
Më datë 17.04.2021, u referuan materialet në Prokurorinë pranë Gjykatës së Shkallës Parë Tiranë dhe punohet për kapjen e shtetasve të shpallur në kërkim E. S., 26 vjeç, A. M., 25 vjeç dhe S. K., 34 vjeç, pasi në rrugën “Selim Braja” në Sauk të Vjetër, janë konfliktuar për motive të dobëta me shtetasit K. D., 30 vjeç, E. D., 23 vjeç dhe R. D., 27 vjeç (vëllezër).
Si pasojë e konfliktit janë dëmtuar lehtë me sende të forta shtetasit K. D dhe E. D, si dhe është dëmtuar me mjet prerës shtetasi R. D, i cili ndodhet në spital, jashtë rrezikut për jetën. Në vijim të veprimeve u procedua në gjendje të lirë shtetasi B. H., 36 vjeç, pasi ka kanosur shtetasin K. D.
Punohet për kapjen dhe shoqërimin e 3 shtetasve të shpallur në kërkim.