Gjermanët janë akoma të pavendosur sa i takon vendimit për hapje negociatash për Shqipërinë. Qoftë deputetë të mazhorancës gjermane, ashtu edhe përfaqësues të opozitës kanë qëndrime të kundërta me njëri-tjetrin për këtë temë. Deri më tani vetëm Gunther Krichbaum ka dalë zyrtarisht kundër çeljes së negociatave, ndërsa “Deutche Welle” ka marrë disa reagime edhe nga deputetë të tjerë. Ajo që vihet re është se midis tyre ka personalitete që mendojnë se vendi ynë ka bërë mjaftueshëm dhe në qershor mendon të shpërblehet, ndërsa të tjerë argumentojnë se është akoma herët.
Më konkretisht, deputeti socialiademokrat, Michael Roth, i cili është edhe ministër Shteti për Evropën, ka deklaruar se vota e tij pro Shqipërisë do të jepet vetëm nëse Bundestagu dhe Bundesrati të thonë po. “Qeveria Federale dhe unë, si përfaqësues në Këshillin për Çështje të Përgjithshme, do të themi po, kur të marrim dritë të gjelbër nga Kuvendi Federal (Bundestag) dhe Këshilli Federal (Bundesrat), gjë që për momentin nuk po e shoh ende”, tha ai.
Në vijim, Roth shtoi se ai personalisht e mbështet hapjen e negociatave për Shqipërinë, por theksoi se ka rezerva nga CDU-CSU. Nga ana tjetër, ish-kryetari i Partisë Socialdemokrate, Kurt Beck, i cili sot është President i fondacionit “Friedrich Ebert”, nënvizoi se Gjermani së shpejti duhet të gjejë një qëndrim të përbashkët për këtë çështje. “Mes dy partive të koalicionit ka diskutime. Ka një sërë politikanesh dhe politikanësh në CDU-CSU që vërtet janë skeptikë. SPD-ja do që t’ia hapë rrugën Shqipërisë. Tani ka nisur procesi i krijimit të mendimit unë shpresoj që ai të dalë pozitiv”, tha Beck.
Deputetët kundër Krichbaum
Sakaq, disa deputetë të tjerë janë shprehur se e mbështesin hapjen e negociatave për vendin tonë. Ka edhe nga ata politikanë që bëjnë pjesë tek opozita gjermane, siç është rasti i Manuel Sarrazin, i cili e kundërshton qëndrimin e Gunther Krichbaum. Manuel Sarrazin është deputet i partisë Të Gjelbrit dhe njëkohësisht anëtar i Komisionit të Bundestagut për BE dhe gjatë prononcimit të tij për “DW” e konsideron të nevojshme uljen e Shqipërisë në tryezën e negociatave.
“Kush ka interes ta nxisë qeverinë shqiptare të çojë përpara reformat, duhet të kuptojë se çelja e negociatave na jep më shumë instrumente për të kërkuar transformime konkrete, sesa po t’i zvarrisim ato pa afat”, deklaroi ai.
Sarrazin shtoi më tej se Shqipëria i ka plotësuar kushtet sepse e ka ndërmarrë procesin e vetingut dhe po jepen rezultate. “Shqipëria është një vend kyç për integrimin e suksesshëm të Ballkanit Perëndimor në BE dhe momenti aktual është shumë vendimtar për të qenë i suksesshëm në të gjithë rajonin”, theksoi deputeti i opozitës gjermane. Nga ana tjetër, ministri i Shtetit për Evropën, Michael Roth ceku pak gjatë reagimit të tij edhe sjelljen e opozitës shqiptare në Parlament. Ai i dha një “shuplakë” opozitarëve tanë, duke theksuar se sjellja e tyre është e papranueshme.
“Sjellja e opozitës në Parlament është e papranueshme. Nuk mund të ndërpritet thjesht puna parlamentare dhe të dalësh nga Parlamenti. Duhen shfrytëzuar instrumentet demokratike. Por unë pres që qeveria dhe partitë qeveritare të bëjnë gjithnjë tre hapa përpara drejt opozitës dhe të mos presin derisa të vijë opozita dhe të bëjë një hap drejt tyre”, tha ministri gjerman Roth. Po ashtu, ai u shpreh se shpreson që të hapet një proces ndaj ish-ministrit të Brendshëm, Saimir Tahiri që të kuptohet që organet e drejtësisë janë të pavarura./SOT