Arta Marku kryeprokurore e përkohshme e Shqipërisë, e votuar në Kuvend mes tymueseve, miellit dhe çizmeve të opozitës ka vendosur të “marrë frymë” pak. Kështu thotë populli ynë kur dikush vendos të pushojë dhe të qetësohet pas punëve të shumta dhe tensionit të krijuar nga kjo punë.
Kjo me sa duket i ka ndodhur dhe Arta Markut, e cila mori përsipër një barrë shumë të rëndë, atë të arrestimit të “peshqve të mëdhenj” që kishin dosjet gati, deri në momentin kur të fillonte nga funksionimi SPAK.
Në të vërtetë janë shumë dosje të cilat janë gati, thuajse në përfundim për t’u dërguar në gjykatë, por ende nuk po dërgohen për gjykim. Ndoshta janë në pritje të kopsitjes më tej.
Kanë ardhur shumë materiale nga FBI amerikane, DEA e antidrogës, shërbimet partnere të BE, për ‘21 janarin’, ‘Gërdecin’, ‘Rrugën e Kombit’ dhe sidomos për aferën e CEZ dhe DIA-s, duke plotësuar dhe ato mungesa që kanë qënë konstatuar, por deri më tani ende nuk ka ndodhur ‘mrekullia’ e dërgimit në gjykatë.
Mes tyre është dhe dosja e byzylykëve elektronikë ku janë të akuzuar drejtorë burgjesh, një ekspert që i shpëtoi bythen Ilir Metës nga video e përgjimit dhe dy ish ministrat e Drejtësisë nga LSI, Ylli Manjani dhe Petrit Vasili.
Ndoshta është pritur krijimi i njësisë antikorrupsion në Tiranë dhe në të gjitha qarqet për ta marrë më shtruar këtë problem.
Kështu sot janë përzgjedhur 5 prokurorët në Tiranë të cilët do jenë pjesë e Task Forcës Speciale “Forca e Ligjit” e cila u krijua mbi bazën e marrëveshjes mes kryeprokurores Arta Marku dhe minsitrit të Brendshëm Fatmir Xhafaj.
Prokurorët e përzgjedhur janë Marjola Mertiri, Ndin Tavani, Daniela Sulaj, Anisa Cilimi dhe Afërdita Ndoj.
Prokurorët pjesë e strukturës “Forca e Ligjit” pranë Prokurorisë së Rrethit Gjyqësor Tiranë do hetojnë krimin e organizuar, korrupsionin dhe veprat e tjera të rënda penale.
Puna e tyre do të përqendrohet në pastrimin e parave, korrupsionin, shpërdorimin e detyrës nga zyrtarët shtetërore, trafiqet e paligjshme dhe ndaj krimit të organizuar.
Një përgjegjësi e madhe për këtë trupë prokurorësh.
Por po të analizojmë një nga një këta prokurorë, mësojnë se një pjesë e tyre kanë konflikt interesi, sidomos përsa i përket pasurisë por dhe lidhjen me dosje konkrete.
Kështu prokurori Ndini Tavani ka pushuar procedimin penal për çështjen e byzylykëve elektronikë që përdoren për të dënuarit.
Prokurori Tavani, i cili njihej si ndër prokurorët e preferuar të Adriatik Llallës, pas Rovena Gashit kuptohet, brenda 3 muajsh vendosi pushimin e çështjes së bujshme që ishte rikthyer për hetim me vendim të gjykatës së Tiranës.
Ndërkohë që ministrja e Drejtësisë Etilda Gjonaj është zotuar që do të vazhdojë rrugën ligjore për zbardhjen e çështjes dhe vënien para përgjegjësisë të autorëve duke vënë në dispozicion të gjitha aktet e nevojshme që do vlejnë për hetim.
Skandali plasi kur në krye të ministrisë së Drejtësisë u vendos ministri teknik Gazmend Bardhi i cili zbuloi se 300 byzylykë për mbikqyrje elektronike të të pandehurve me vlerë rreth 2 milionë euro mungonin në ministrinë e Drejtësisë.
Bardhi kërkoi nisjen e procedimit për specialistët e shërbimit të provës por edhe të ministrisë së Drejtësisë, që kanë firmosur dokumentin për dorëzimin e 300 byzylykëve.
Pas denoncimit të Bardhit, një pjesë e byzylykëve u kthyen nga kompania e cila ofronte shërbimin, por nga kontrolli rezultoi se pajisjet ishin jashtë funksionit, duke i bërë kështu të papërdorshëm për të dënuarit e vendosur në mbikqyrje elektronike.
Sipas Bardhit, për gati 90 persona që mbanin byzylykët, ishin evidentuar raste që personat e kishin hequr byzylykun pa u konstatuar nga salla e mbikëqyrjes. Por prokurori Ndini Tavani i futi një pushim çështjes dhe me sa duket ranë “rehat” të gjithë.
Por pikërisht ditën e sotme Prokurori Ndini Tavani caktohet nga Arta Marku në përbërje të Task Forces që do të luftojë korrupsionin në Shqipëri, do marrë përsipër hetimin e bandave të krimit, bandave të ministrave që vodhën dhe nuk lanë gjë pa rrjepur në këtë vend dhe krime të tjera.
Mes tyre Ndini Tavani do të marrë dhe dosjen e byzylykëve eketronikë të burgjeve, ku janë të implikuar ish drejtorët e buregjeve dhe ministrat e drejtësisë përfaqësues të LSI, Ylli Manjani dhe Petrit Vasili.
Kjo dosje do të hapet me patjetër dhe do të shkojë në gjykatë pasi është betuar Ministrja e Drejtësisë Etilda Gjoni që është sfidë e saj. Do të hetojë këtë dosje që e ka pushuar vetë prokurori Ndini Tavani?!
Sigurisht që jo, pasi ka dhe konflikt interesi por dhe probleme të tjera.
Prokurori Ndini Tavani është prototip i pushimit të çështjeve, pasi ai pushoi hetimet edhe ndaj mjekut të sanatoriumit, Fatmir Çaushi. Pavarësisht se ky i fundit shfaqej në kamerën e fshehtë të emisionit “STOP”, duke marrë 600 mijë lekë nga një i afërm i një pacienti.
Në argumentim thuhet se asnjë nga të afërmit e pacientit nuk pranon të ketë dhënë para. Po kështu mjeku pretendon se bëhet fjalë për montim. Kaq ka mjaftuar që përfaqësuesi i akuzës të pushojë çështjen.
Ndini Tavani prej vitesh është prokuror në Tiranë dhe njihet për një sërë dosjesh të konsideruara delikate përfshirë më të fundit atë të vjedhjes me shpërdorim detyre, ku në burg përfundoi ish-ministri i Punës në Qeverinë “Berisha”, Spiro Ksera. Për vjedhje “kinkalerike” më saktë. Pasi të gjithë e shitën Spiro Kserën, dhe Tavani as që kishte ndonjë përfitim mos ta dënonte.
Vlen të theksohet se Prokurori Ndini Tavani ka pasur në hetim biznesmenin supermashtrues Rezart Taçi që dihet se u la i lirë
Por pas largimit të Ramadan Trocit përfaqësoi akuzën për llogari të shtetit në të ashtuquajturën vjedhja e shekullit në Bankën e Shqipërisë. Dihet, u vodhën 750 milionë lekë dhe nuk u kthye asnjë qindarkë në arkën e shtetit shqiptar.
Njëherësh ish Guvernatori i Bankës së Shqipërisë, Adrian Fullani mori një shumë të majme dëmshpërblim, pasi ishte stresuar shumë në paraburgim.
Shtetin në humbje e përfaqësoi pikërisht Prokurori Ndini Tavani, i cili tashmë është në përbërje të njësisë që do bëjë “namin” duke luftuar bandat, korrupsionin dhe krimin në Tiranë.
Njëherësh Ardian Braho, një nga prokurorët e dosjes që po heton abuzimet me privatizimin e OSSH, tek kompania çeke CEZ, është larguar nga hetimi i kësaj dosje.
Mësohet se pak ditë më parë, prokurori Braho ka paraqitur tek drejtuesi i prokurorisë Dritan Rreshka, dorëheqjen nga ky hetim, kërkesë kjo që është miratuar.
Pas largimit të Brahos, në këtë dosje voluminoze dhe tepër të debatueshme Prokurori Ndini Tavani bashkë me një koleg tjetër, po udhëheqin hetimin për këtë çështje shumë të përfolur në korridoret e politikës.
Kjo pasi në procedurat e privatizimit dyshohet se është i implikuar dhe djali i ish-kryeministrit Sali Berisha, Shkëlzen Berisha.
Gjatë kësaj periudhë Berisha është marrë në pyetje në prokurori, duke pretenduar se nuk ka asnjë lidhje me akuzat politike që i bëhen për privatizimin e kompanisë energjetike.
Ndërkohë që lidhur me këtë çështje është marrë në pyetje dhe ish-ministri i Ekonomisë Genc Ruli dhe një sërë ish-zyrtarë të tjerë.
Prokuroria e Tiranës ka kërkuar të pyesë dhe biznesmenin Nue Kalaj, por për shkak se ky i fundit qëndron në Kosovë, prokurorët kanë dërguar një letërporosi në këtë shtet për të kryer marrjen në pyetje të tij. Dhe çështja është shtyrë dhe me tre muaj të tjerë.
Duke ndjekur çështjet që ka pasur në ngarkim për hetim prokurori Ndini Tavani, pothuajse është e sigurtë se dhe CEZ i është dhënë për ta dështuar dhe për ta pushuar.
Nuk duam të besojmë se Arta Marku është “thyer” nga presionet apo është lodhur nga dosjet e rënda aq shumë sa të caktojë një prokuror të tillë në njësinë antikorrupsion në Tiranë. Duke e dështuar zbardhjen e dosjeve të rënda në Shqipëri që në “gjenezë”./Pamfleti.com