Presidenti i Partisë Socialiste Europiane, Sergei Stanishev i ka dërguar një letër kryeministrit Rama në kuadër të zgjedhjeve të 25 prillit, në të cilën thekson se është një datë e rëndësishme për rrugëtimin drejtë Bashkimit Evropian.
Stanishev ndër të tjera shkruan se zgjedhjet e 25 Prillit po ashtu kanë një rëndësi të veçantë edhe për rimëkëmbjen ekonomike pas pandemisë, si dhe për rindërtimin pas tërmetit tragjik të 26 nëntorit 2019.
Ndër të tjera Stanishev ka vlerësuar Partinë Socialiste duke thënë se ishte ndjerë u lumtur për ekipin energjik të PS.
Letra e plotë e PES:
I dashur Kryeministër, i dashur Edi!
Shpresoj që ky mesazh t’ju gjejë shëndoshë e mirë ju dhe familjen tuaj.
Teksa po i afroheni zgjedhjeve të përgjithshme të 25 prillit, do doja t’ju shprehja ju dhe simotrës sonë, Partisë Socialiste të Shqipërisë, një mesazh të ngrohtë mbështetjeje.
Këto zgjedhje kanë rëndësi të madhe për rrugën e Shqipërisë drejt Europës, për vijimin e reformave dhe të rimëkëmbjes ekonomike pas pandemisë, si dhe për rindërtimin pas tërmetit tragjik të 26 nëntorit 2019.
Në këto tetë vite, Partia Socialiste dhe ju personalisht keni treguar lidership të jashtëzakonshëm në drejtimin e një rruge të guximshme drejt reformave të thella e të pakthyeshme, veçanërisht në sistemin e drejtësisë. Reformat po japin fryte: ju keni filluar tashmë të rindërtoni një sistem drejtësie të bazuar në integritet dhe profesionalizëm, duke u bërë kështu shembull për të gjithë rajonin e më gjerë.
U ndjeva shumë i lumtur kur pashë që keni mbledhur një ekip plot energji dhe me një larmi kandidatësh për zgjedhjet e ardhshme parlamentare, duke u mbështetur shumë te gratë dhe të rinjtë. Besoj se këto dy forca të fuqishme do të kontribuojnë në fitoren elektorale më 26 prill, si dhe në thellimin e mëtejshëm të reformave dhe zhvillimit ekonomik të vendit në mandatin tuaj të tretë qeverisës.
Duke ju uruar suksese në zgjedhjet e ardhshme parlamentare.
Sinqerisht i juaji,
Sergei Stanishev
President i Partisë Socialiste Europiane.