Artan Hoxha ka zbardhur disa detaje për vrasjen mafioze të Behar Sofisë.
“Ngjarja e sotme është shumë e rëndë për mënyrën si ndodhi, orarin dhe vendin.
Këto janë vrasje me mesazh brenda., Mesazhi në këtë rast nuk ka objektiv vetëm ekzekutimin e viktimës.
Më duket e ngjashme me vrasjen e bankierit Santos, para bankës për t’i çuar mesazh objektivit.
Kjo është tipike vrasje mafioze me vrasës të paguar, ku ezkekutori nuk ka lidhje me viktimën.
Në vendin e ngjarjes është parë një qitës i vetëm.
Kjo mund të jetë bërë për lehtësi, për ta nxjerrë atë nga vendi i ngjarjes.
Ajo që është fakt, është se kemi të bëjmë me një vrasës të vetëm.
Viktima eshtë një nga personazhet më të vjetër në qarkullim.
Ka qenë aktiv për më shumë se dy dekada.
Pas ardhjes së demokracisë, ai është me të kaluar ushtarake.
Ka qenë pjesë e FA dhe pastaj është larguar drejt Turqisë.
Për herë të parë ka dalë me emrin Fatmir Sofia në vitin 1998.
Ka qenë një emër në qarkullim që askush nuk i afrohej.
Ka pasur tentativa të mëparshme për ta vrarë.
Aftësia e personazhit që ka humbur jetën sot, ka qenë se gjithmonë gjente lidhjet e duhura në radhët e policisë së shtetit.
Më shumë spikaste si biznesmen.
Sa herë përmendej emri i tij, policia shikonte me dyshim. Prandaj u bë i rëndësishëm.
Ishte një nga njerëzit më të fortë në Shqipëri që nga momenti kur u bë objektiv i disa atentateve të njëpasnjëshme.
Ai po përpiqej të siguronte një jetë normale për fëmijët e vet.
Ai në botën e krimit ishte personazhi që fluturonte ulët, që të mos bëjë shumë zhurmë.
Në trafikun e heroinës që vjen nga Afganistani ishte ndër më të rëndësishmit.
Në vitin 1998 është kapur me personazhe shumë të famshëm të Shijakut.
Eshtë kapur dhe me një futbollist të Fenerbhaçes”, tha Artan Hoxha për ABC News.
Artan Hoxha u shpreh se viktima ishte personazhi kyç që mund të zbardhte masakrën e gushtit 2009 ku u vranë 4 oficerë policie në Durrës.
Gazetari tha se Behar Sofia ishte i pranishëm me makinën e tij në vendin e ngjarjes, ku u vranë policët dhe se ishte ai që njoftoi policinë për praninë e Dritan Dajtit, të cilit dyshohet se i ngriti kurth në momentin që po i dorëzonte 400 mijë euro për ta nxjerrë jashtë loje me duart e policisë, por gjithçka përfundoi në tragjedi.
“Në skenën e krimit kemi një “Tuareg” që ishte objektiv i operacionit, e ndezur me derën e pasagjerit hapur, ai ishte në pritje të dikujt që do të vinte.
Dy makinat e operacionales ishin pas, policët që vdiqën dhe një gjë që nuk e thoshte askush, ishte më e frikshme, ky është pengu më i madh në këtë histori. Kush e çoi policinë aty dhe ç’donte në atë moment?
Kjo makinë Benz me targë TR 1638 S është kapur rastësisht nga pamjet dhe vetëm më vonë duke parë me detaje kemi gjetur këtë makinë paralele me “Tuareg”-un e Dritan Dajtit. Policia arrestoi tre vëllezër që kishin një makinë me targë të zakonshme, por jo kjo.
Kjo u shfaq aty dhe nuk u pa më. Kjo makinë sipas hetimeve që u bë pas rezulton që ka qenë e viktimës së sotme që ka shkuar për të dorëzuar diku te 400 mijë euro. Njeriu që ia ka dhënë informacionin policisë është pikërisht Behar Sofia.
Policia e fshehu informacionin për Dritan Dajtin. Ky operacion u bë jo me RENEA-n, por me skuadër operacionale dhe patëm ato pasoja që patëm. Ky është një personazh me lidhje të forta brenda policisë. Ky nuk bëri kurth ndaj policisë por Dritan Dajtit.
Gjëja që dua të them është që si u zhduk ky Benz? Pse nuk u përfshi? Nuk e di në pronësi të kujt ishte, por u zhduk. Bashkë me të u zhduk edhe shuma e madhe me para. Si prova materiale u fiksuan si sasi 2 mijë euro, që Dritan Dajti i kishte në xhep.
Pse Sofia ndodhej aty? Pse po i dorëzonte këtë shumë? Për cfarë po e dorëzonte? Operacioni aty është bërë kur drejtori i policisë kriminale nuk ka qenë në Shqipëri dhe i policisë Tiranë ka qenë me pushime. Në detyrë ishte vetëm drejtori i policisë së shtetit.
Edhe brenda radhëve të policisë ka pasur klane që janë përplasur. Një operacion për të arrestuar më të kërkuarin përfundoi me katër të vrarë dhe bota e trafikut do të hiqte qafe një konkurrent. Behar Sofia krijon përshtypjen se do të hiqte qafe kundërshtarin e vet duke përdorur policinë, që do ta arrestonte do ta hiqte nga qarkullimi” tha ai.
“Nuk jam marrë shumë sot me pistën, por episodet ku ka qenë i përshirë më parë. Kjo është një ngjarje simbol që tregon çfarë ishte. Lidhjet e tij brenda policisë. Ngjarjen konkrete e quaj personazhin e fundit kyç, që nëse do të ndodhej para drejtësisë do të tregonte deri ku është e korruptuar kupola e policisë.
I vetmi që do ta na tregonte të vërtetën, do të zbërthente cfarë ka ndodhur. Skuadra operacionale shkoi në vendin e ngjarjes me armë të paregjistruara” tha më tej Artan Hoxha