Rriten kërkesat e gjyqtarëve dhe prokurorëve të ngelur në veting për licenca avokatie. KPK dhe KPA kanë rritur ndjeshëm numrin e emrave të shkarkuar, por shumë prej tyre kanë gjetur një mënyrë tjetër për të qenë pjesë e sistemit, atë të avokatisë.
Ka shumë nga ata që shumë vite më parë kanë pasur licenca avokatie dhe i kanë pezulluar pasi janë emëruar gjyqtarë apo prokurorë.
Pothuajse të gjithë pas ngeljes në veting i kanë riaktivizuar këto licenca. Ndërkohë mësohet se ka dhe shumë të tjerë që kanë shtuar kërkesat pranë Dhomës së Avokatisë, ndërsa një pjesë ndjekin studimet e Shkollës së Avokatisë.
Por ajo që bie në sy është se nuk ka një penalizim të fortë për ta. Disa muaj më parë u bë e ditur se Dhoma e Avokatisë ka vendosur të pezullojë licencat për ta, ndërsa gazeta ka mësuar së fundmi se vendimi nuk është ai. Këshilli Kombëtar i Avokatisë ka vendosur që për 5 vite të gjithë gjyqtarët dhe prokurorët e hetuar gjatë procesit të rivlerësimit nga organet e vetingut të mos marrin pjesë në organet e qeverisjes të avokatëve, domethënë në Këshillin Kombëtar dhe Dhomat Lokale.
Ndërkohë sa i takon marrjes së titullit të avokatisë nuk ka asnjë problem, pasi të gjithë mund të bëhen avokatë dhe të mbrojnë ata që kanë hetuar apo gjykuar dikur. Pak kohë më parë, kreu i avokatëve penalistë, Saimir Vishaj e cilësoi skandal një gjë të tillë, pasi sipas tij, ka shumë emra që po pastrojnë para përmes dhomave të avokatisë.
Rreziku për pastrim parash
Kohët e fundit ndërkombëtarët dhe mazhoranca kanë rritur presionet ndaj organeve të prokurorisë që të hetojnë gjyqtarët dhe prokurorët e ngelur në veting. Ka shumë që nuk i justifikojnë pasuritë, por duke qenë se vetingu nuk është proces penal, ata thjesht janë shkarkuar. SPAK ka nisur hetimet për ish-anëtarët e Gjykatës së Lartë dhe asaj Kushtetuese, por janë mbi 130 emra të tjerë që shijojnë pronat e vëna gjithë këto vite. Ajo që bie në sy është se janë rreth 30 të shkarkuar me formë të prerë që kanë marrë licenca avokatie. Por shumica nuk janë thjesht avokatë, por kanë hapur studio ligjore.
Kjo do të thotë se kanë punësuar dhe të tjerë aty dhe gjenerojnë shumë fitime. Por kjo mund të jetë dhe një mënyrë për të justifikuar paratë nëse një ditë nisin hetimet penale. Ka disa që kanë rreth 2 vite që kanë nisur punën dhe të ardhurat më pas mund t’i justifikojnë përmes zyrave të avokatisë. Ndërkohë bie në sy se shumë prokurorë apo gjyqtarë që kanë gjykuar apo hetuar personazhe të mëdhenj të botës së krimit, sot janë kthyer në avokatin e tyre duke sulmuar sistemin ku ata kanë qenë për 30 vite.
Të dorëhequrit
Një numër i madh licencash janë dhënë edhe për të dorëhequrit. Ka shumë nga ata që i kanë rënë hiles gjatë vetingut, për të shpëtuar nga “damkosja” e të korruptuarit. Kush shkarkohet për probleme pasurie rezulton se është i korruptuar, por janë rreth 50 emra që kanë dhënë dorëheqjet gjatë vetingut. Një pjesë sapo janë njohur me aktet e para të rivlerësimit kanë dhënë dorëheqjen duke mos lejuar daljen në publik të të dhënave mbi pronat korruptive. Por mes atyre që sot janë avokatë ka dhe nga këta. Madje, disa ish-anëtarë të Gjykatës së Lartë që janë dorëhequr sot kanë zyra të mëdha ligjore. Mbetet të shihet se çfarë do të bëjë SPAK dhe prokuroritë e tjera, pasi SHBA dhe BE e shohin si imediate hetimin e të ngelurve në veting.