Kjo është ndërtesa më e lartë në botë, Burj Khalifa, në zemër të Dubait. Por nëse shikon 360 gradë rreth saj vërën me dhjetëra ndërtesa të larta, që mbajnë emrin e kompanisë EMAA, e cila është e specializuar edhe në transformimin e porteve ekzistuese në marina për jahte e rezidenca banimi.
Me një portofol ndërtimesh këto 20 vitet e fundit, edhe në disa vende të tjera të botës përveç Dubait, EMAAR është futur në garë me kohën për të bërë realitet një investim prej dy miliardë euro në transformimin e portit të Durrësit.
Një grup pune ndërministror, udhëhequr nga ministrja Belinda Balluku qëndruan në Dubai për t’u koordininuar me kompaninë EMAAR, me qëllimin e bërjes realitet të këtij projekti gjigant.
“Shteti shqiptar nuk do të ketë asnjë involvim (përfshirje) financiar. Ne do të angazhojmë ligjet që janë në fuqi, si ligjin e investitorit strategjik, si ligjin e turizmit, i cili lehtëson dhe ndihmon investitorët e huaj në vend. Duhet pasur parasysh që shteti shqiptar duhet të ketë vetëm përfitime financiare nga ky projekt dhe sigurisht të gjithë të tjerët. Cilët janë përfitimet? Përfitimet janë një injektim prej 2 miliardë dollarësh në tregun shqiptar dhe kjo do të ketë ndikim në punësim në ndërtim, në promocion, në shërbime”, sqaron Balluku.
Ky është Mohammed El Alabbar, mendja dhe fuqia udhëheqëse e suksesit të AMAAR grup. Në një intervistë me të dërguarin e Top Channel në Dubai, gazetarin Muhamed Veliu, ai shpjegon vizionin e transformimit të Durrësit në një prej porteve turistikë më të mëdha në Mesdhe.
“Kur flas për Shqipërinë e Durrësin e shikoj atë në këndvështrimin global, duke e krahasuar atë me ndërtimet që kam bërë, si për shembull porti i Dubait si dhe atë të Tanxhirit që ne po e rindërtojmë. Natyrisht përmes punës tonë ne bëjmë para, nga ana tjetër me atë që do të bëjmë në Durrës, të tjera kompani do ta shohin e do të afrohen në Shqipëri me investime të tjera. Pas marrëveshjes së nënshkruar nga dy qeveritë, ne po i lëvizim gjërat shpejt. Masterplani është përfunduar dhe po bëjmë ato ndryshimet e fundit. Shpresojmë që ne të finalizojmë marrëveshjen pas tre muajsh. Thënë kjo me nuk po humbim kohë duke pritur marrëveshjen, por po punojmë për projektin e detajet. Unë jam optimist dhe shpresoj të nisim nga puna gjatë verës dhe me të vërtetë kjo do të jetë shumë e shpejtë” deklaroi Mohammed El Alabbar.
Krahas Dubai Marina, kompania AMAAR është drejt përmbylljes të një tjetër projekti gjigant, atë të transformimit të portit Rashid në një kompleks gjigant shërbimesh e banesash. Arkitekti Grant Blindell thotë se ky model i portit Rashid do të jetë i ngjashëm me atë në Durrës.