Deputetja e Partisë Socialiste për Qarkun e Gjirokastrës, Artemis Malo ka komentuar situatën politike në vend, ndërsa ka shpërthyer në akuza të forta në adresë të opozitës joparlamentare.
Gjatë një prononcimi për gazetën “SOT”, deputetja socialiste u shpreh se Lëvizja Socialiste për Integrim është destinuar, madje sipas saj, partia më e rrezikuar që të kapitullojë në 25 prill, ndërsa shtoi se këtë gjë e tregon fare mirë edhe mënyra se si çifti Kryemadhi-Meta po bëjnë politikë.
Sipas saj, fakti që Meta dhe Kryemadhi janë tërbuar, tregon qartë se ata e kanë kuptuar që LSI do të shkrihet dhe do të marrë një goditje të fortë në zgjedhjet parlamentare të 25 prillit të vitit 2021. “Po të vini re ditët e fundit çifti presidencial është futur në panik, për shkak se po e shikojnë që Lëvizja Socialiste për Integrim po merr të tatëpjetën dhe se ajo është e destinuar që të kapitullojë në zgjedhjet parlamentare të 2 prillit. Kështu që thirrjet e presidenti Ilir Meta dhe LSI për të përmbysur qeverinë dhe Partinë Socialiste janë thirrje dëshpëruese që vijnë në një kohë që ata po shikojnë se po u vjen fundi.
Është e turpshme që presidenti Meta sulmon dhe akuzon mazhorancën socialiste qeverisëse me një gjuhë rrugaçi. Por dua të theksoj se një gjë është e sigurtë në këtë mes, që Meta-Kryemadhi po sulmon PS dhe kryeministrin Edi Rama, pasi në zgjedhjet parlamentare të 25 prillit LSI do marrë një goditje të fortë dhe do të shkrihet si parti”, deklaroi ajo.
Më tej deputetja e Partisë Socialiste për Qarkun e Gjirokastrës, Artemis Malo u shpreh ditën e djeshme se ndihet e keqardhur që opozita dhe presidenti Ilir Meta po bëjnë politikë me pandeminë dhe tërmetin. “Turp dhe skandal që opozita e udhëhequr nga Partia Demokratike dhe Lëvizja Socialiste për Integrim, si dhe presidenti Ilir Meta po bëjnë politikë me pandeminë, me vdekjet nga Covid-19 dhe me situatën post tërmetit.
Këta mirë që nuk ndihmojnë, por nuk dinë as të heshtin, pasi po të mos ishte Partia Socialiste, sot qytetarët do të ndiheshin të braktisur në çdo aspekt. PS është një parti që ka prioritet vetëm interesin e qytetarëve dhe ne premtimet që kemi thënë për tërmetin po i mbajnë dhe do t’i bëjmë realitet”, nënvizoi deputetja e Partisë Socialiste për Qarkun e Gjirokastrës, Artemis Malo për gazetën “SOT”.