Kreu i Shoqatës së Avokatëve Penalistë, Saimir Vishaj ka rrëzuar Strukturën e Posaçme Kundër Krimit të Organizuar dhe Korrupsionit sa u takon hetimeve në radhët e të ngelurve në veting.
Kjo e fundit ka deklaruar pak kohë më parë se ka nisur hetimin për disa ish-gjyqtarë dhe ish-prokurorë të ngelur në veting. Por avokat Vishaj gjatë një prononcimi për gazetën “SOT”, u shpreh ditën e djeshme se deri më tani nuk ka asnjë hetim ndaj të ngelurve në veting, duke rrëzuar kështu SPAK-un.
“Nuk kanë filluar hetimet për të ngelurit në veting nga Struktura e Posaçme Kundër Krimit të Organizuar dhe Korrupsionit, për asnjë gjyqtar dhe prokuror. Pra situata është që nuk ka asnjë hetim ndaj të ngelurve në veting, plus që është shumë e vështirë”, deklaroi ai.
Ja masat që ka marrë Këshilli Kombëtar i Avokatisë
Më tej gjatë prononcimit të tij kreu i Shoqatës së Avokatëve Penalistë, Saimir Vishaj komentoi edhe vendimin e bërë publik pak ditë më parë nga Këshilli Kombëtar i Avokatisë, i cili deklaroi se iu kishte pezulluar aktivitetin e avokatit, gjyqtarëve dhe prokurorëve të ngelur në veting.
Por avokat Vishaj zbuloi se të ngelurit në veting janë përjashtuar nga organet e qeverisë së avokatëve dhe se ata që kanë marrë titullin e avokatit, pavarësisht se janë përjashtuar sipas tij, do të jenë pjesë e sistemit të drejtësisë duke ushtruar profesionin e avokatit.
“Këshilli Kombëtar i Avokatisë ka marrë masa që për 5 vite të gjithë gjyqtarët dhe prokurorët e hetuar gjatë procesit të rivlerësimit nga organet e vetingut të mos marrin pjesë në organet e qeverisjes të avokatëve, domethënë në Këshillin Kombëtar dhe Dhomat Lokale. Ndërsa gjyqtarët dhe prokurorët e ngelur në veting që kanë marrë titullin e avokatisë nuk ka asnjë problem dhe ata ta gëzojnë titullin, duke u bërë pjese e sistemit të drejtësisë”, u shpreh ai.
Ndërkohë, kreu i kreu i Shoqatës së Avokatëve Penalistë, Saimir Vishaj zbuloi se Këshilli Kombëtar i Avokatisë ka vendosur që të ngelurve në veting, t’ju mbyllë derën duke mos i lejuar të jenë pedagogë, sikundër janë aktualisht disa prej tyre. “Nga ana tjetër, ne si Dhomë Avokatie e Shqipërisë kemi marrë masa që asnjë gjyqtar dhe prokuro i ngelur në veting dhe që është përjashtuar me vendim nga Kolegji i Posaçëm i Apelimit të mos jenë pjesë e trupës pedagogjike. Pasi në fund fare çfarë do t’ju mësojnë studentëve ata”, tha ai.
Kujtojmë që pak ditë më parë gjatë një prononcimi për gazetën “SOT”, avokat Vishaj theksoi se ata i kanë dërguar një shkresë Ministrisë së Arsimit ku u kërkojnë që të mos lejojë që ish-gjyqtarët dhe ish-prokurorët e ngelur në veting dhe që akuzohen si të korruptuar të jenë pedagogë. “Dua t’ju bëj me dije se i kamë bërë një kërkesë zyrtare Ministrisë së Arsimit që të gjithë ish-gjyqtarët dhe ish-prokurorët e ngelur gjatë procesit të vetingut të mos jenë pjesë e stafit pedagogjik duke dhënë mësim në Fakultetin e Drejtësisë.
Këtë nuk kanë çfarë t’ju mësojnë studentëve, pasi nuk ka moralë që një gjyqtar dhe një ish-prokuror që ka ikur nga sistemi duke ngelur në veting për shkak se kanë qenë të korruptuar, të japin mësim. Kjo do të thotë se të gjithë gjyqtarët dhe prokurorët e ngelur në veting nuk duhet dhe do të japin më mësim në Fakultetet e Drejtësisë qofshin këtë publik dhe jopublik, në Shkollën e Magjistraturës, apo Shkollën e Avokatisë në Shqipëri”, nënvizoi avokat Vishaj.
SHBA kërkon hetimin e gjyqtarëve të shkarkuar nga vetingu
Por hetimin e të ngelurve në veting e kërkon me ngulm edhe ambasadorja e Shteteve të Bashkuara të Amerikës në Tiranë, Yuri Kim, e cila pak ditë më parë i bëri thirrje drejtësisë shqiptare që të hetojë korrupsionin gjyqësor. Përmes një mesazhi në “Twitter”, teksa shpërndau deklaratën e kreut të grupit të PS, Taulant Balla, për spastrimin e sistemit të drejtësisë, ambasadorja Kim theksoi të premte se deri më tani asnjë prokuror apo gjyqtar, që ka ngecur në veting, nuk është ndjekur penalisht apo dënuar.
“Që kur ka filluar Vetingu, asgjë gjyqtar apo prokuror i vetëm nuk është ndjekur penalisht apo dënuar. Nevoja për të hetuar korrupsionin gjyqësor, përtej Vetingut, është përfshirë në kushtet e përcaktuara nga BE për hapjen e bisedimeve të pranimit në BE”, thuhet në mesazhin e ambasadores Yuri Kim./Rigels Seliman