Shqipëria është vendi i cudirave dhe paradokseve të mëdha. Njerëzit që punojnë dhe kanë suksese lihen mënjanë e përjashtohen, kurse servilët, të paaftët dhe njerëzit e poshtër marrin funksione e bëjnë përpara. Ka mosmirënjohje ndaj atyre që bëjnë punë dhe si rast mund të shërbejë trajneri i Tiranës, braziliani Ze Maria, i cili pasi ngjiti bardheblutë në elitën e futbollit, duket se po bën valixhet gati të kthehet në Brazil. Informacionate para nga klubi bardheblu, që vijnë në formë presioni, duket se forcojnë idenë e largimit të teknikut Ze Maria nga drejtimi i Tiranës. Mirënjohje si kjo ndodhin vetëm në Shqipëri.
Nuk është çështje rezultatesh, sepse dje Tirana ka siguruar matematikisht kthimin në elitë. Presidenti Refik Halili është shprehur se do të bisedojë me trajnerin brazilian, por nëse do ta bëjë këtë gjë, do ta bëjë thjesht për formalitet apo respekt. Gjatë ndeshjes me Pogradecin diçka nuk i ka pëlqyer Ze Marias dhe pas saj ai jo vetëm që nuk ka folur për shtypin, por ashtë larguar nga stadiumi shumë nervoz.
Që kur kanë filluar të dalin fjalët për largimin e trajnerit brazilian nga Tirana, është thënë se shpenzimet për të dhe stafin e tij janë kolosale. Diçka që klubit bardheblu nuk i leverdis. Një tjetër minus për trajnerin Ze Maria është ai që ka të bëjë me faktin se lojtarët e sjellë prej tij në merkaton e dimrit nuk rezultuan të jenë në atë nivel që pritej. Po ashtu, në ndeshje të caktuara, ndërrimet që ka bërë Ze Maria kanë sjellë pakënaqësi te drejtuesit bardheblu, por edhe te vetë lojtarët në fushë. Është e qartë se nuk ka dakordësi me trajnerin brazilian, ndaj dhe largimi i tij mund të konsiderohet fakt i kryer.
Klubi bardheblu ka probleme financiare në këtë moment, ka vonesë me pagat e lojtarëve, por edhe një gjyq të humbur pak ditë më parë me Gjergji Muzakën, që kap një shifër të konsiderueshme. Tirana është kthyer zyrtarisht në Superiore, por për momentin situata nuk duket shumë premtuese. Një klub i zhytur në borxhe po përpiqet të shmangë sa më shumë shifrat e pagesave dhe ndoshta ze Maria po vuan këtë siklet që ka klubi aktualisht. Por për trajnerin mund të bëhej përjashtim, pasi ka merita në rikthimin e Tiranës elitë. /Pamfleti Sport