Një miliardë euro mund t’i kushtojë shqiptarëve skena e turpshme e regjistruar ditën e djeshme në Parlamentin Shqiptar.
Kjo shfaqje pamaturie e politikës shqiptare rrezikon jo vetëm hapjen e negociatave, por edhe fondet strukturore që vendi mund të përfitojë nga Bashkimi Europian.
Aktualisht, instrumenti kryesor i BE-së për financimin e projekteve në vendet e Ballkanit Perëndimor është fondi IPA. Kësaj i bashkohen edhe një numër fondesh të tjera si dhe grantesh direkte nga ana e vendeve anëtare.
Për periudhën 2014-20, Shqipërisë, si një vend kandidat iu alokuan pothuajse 640 miliardë euro, grante IPA.
Ndërkohë, Serbia, duke qenë një vend negociues, përfitoi tre herë më shumë, plot 1,5 miliardë euro.
Ngritja “në kategori”, duke u shndërruar edhe ne një vend negociues, do të çbllokonte për shqipërinë disa qindra miliona euro më shumë, potencialisht deri në një miliardë euro më shumë, që do të financonin pa kosto, pra jo në formë kredie, por një dhurim i drejtëpërdrejtë, me dhjetëra projekte të rëndësishme infrastruktutore, por edhe një numër reformash të domosdoshme për vendin tonë.
Sipas sinjaleve nga Brukseli, në datën 17 prill, kur të publikohet progresraporti për Shqipërinë, do të përfshihet rekomandimi për hapjen e negociatave.
Por, ky është vetëm hapi i parë. Vendimi përfundimtar do të merret në konferencën e kryetarëve të shteteve në muajin qershor dhe mjafton një shtet të vendosë veton e tij, që Shqipërisë të mos i aprovohet nisja e negociatave.
Incidenti i djeshëm në Parlament i jep më shumë argument vendeve euroskeptike apo atyre që nuk dëshirojnë pranimin e Shqipërisë, duke vendosur në rrezik të ardhmen europiane të vendit tonë.
Në fakt, dy gazetat më të mëdha gjermane, “Bild” dhe “Der Standard”, shtruan qartësisht ditën e sotme pyetjen nëse Shqipërisë duhet të pranohet, duke marrë shkas nga ngjarjet e djeshme në Parlament.
“Disa vezë, miell dhe Shqipëria bën kek në Parlament”, ishin tonet ironizuese të “Bild”, gazetës me tirazhin më të madh në Gjermani.
Nëse kjo do të ndodhë, mielli i hedhur ditën e djeshme në Parlament mund të konfirmohet si mielli më i shtrenjtë i historisë, duke na kushtuar plot 1 miliardë euro.